Pentecost NiPum khat sinak Ni
Lam :5-7 Cun Jerusalem khua chungah vawleicung
khuazakip in a rami Judah mi an um liote kha a si; cu hna cu biaknak lei in aa
zuam ngaingaimi pawl kha an si. 6- Cu thawng cu an theih tikah mi tampi an i pum.
A zummi hna an holh tikah khan midang aa pum vemi hna nih khan kanmah holh in
an holh, tiin an rak theih cio tikah khan an khuaruah a har ngaingai. 7- An
lung a suk ngaingai hna i, “Hiti in bia a chimmi hna hi Galilee mi an si ko
tung! 8- Zeitindah kan i chuahkehpimi holh cio holh in kan dihlak in kan theih
kun hna?’
Jn 16:14-15 Keimah nih ka rak in chimhmi hna chung khan an
chimhmi hna cu a lakmi a si lai caah keimah kha a ka thangthat lai. 15- Ka Pa
ngeihmi vialte cu keimah ta an si ko, cucaah cun, ‘Thlarau nih cun ka pekmi cu
aa lak lai i nannih cu an chimh hna lai,’ tiah ka rak in chimh hna kha a si,” a
ti.
Thawhthan cu a vung
dih cuahmah i Pentecost kan phan hoi cang. Zarhpi fatin RC biakinn ah aa pummi
hna cu kan Bawipa Jesuh a thih hnu, lamkaltu hna sin aa phuannak le Mithiang
Peter le a dang Lamkaltu hna cawlcanghnak sin thazaang nan i lak cio lai i, Mithiang
Pawl i khuaruahhar awk a lung aa thlennak, zohchun awktlak a nunzia le
theihharh le controversial a si ngai mi, phundang in chim ah cun a ho hna sin a
chim ti theih lo, a zei kong dah a chim theih lo ah cun mi lamthlang a pialter
dingmi, cun mi tampi zong a pialter cang mi a cawnpiaknak hna cu nan theih nan
hngalh dih cang lai tiah ka zumh ko.
Nihin ni cu Pentecost
Ni a si bangin, nihin Bible relnak in ka hmuhmi ruahnak le Pathian bia kan
hrawm hna lai. Nihin, Bible kan zoh tikah Pathian miphun thar, Isreal thar aa
thawk ni tiah Bupi nih a ti bang in nihin kan Bible cu Bupi lungthin le
cawlcanghnak a tlaih dihmi a si.
Pakhat nak ah Lamkaltu
chung ta kha kan zoh tikah hitin kan hmuh, “Cun Jerusalem khua chungah
vawleicung khuazakip in a rami Judah mi an um liote kha a si,”. Hi nih hin
Bupi cu vawleicung khuazakip in a rami , miphun kip aa cawhmi a si, Catholic a
si, timi kha a langhter. Miphun thleidannak a ngeimi cu RC tak a si kho lo
tinak zong a langhter rih.
Cun
pahnihnak ah, “Cu thawng cu an theih tikah mi tampi an i pum,” a ti. Hi
thawng hi Thiang Tlarau thawng a si i, aa theinak cu Lamkaltu le Nu Mary hna an
i pumhnak a cungdot ah khan a si. Cu caah nihin ni tiang ah Thlarau, ahmaan mi
Thiang Thlarau thawng theihnak cu lamkaltu le Nu Mary hna pumnak, umnak kan Nu
Bupi ah hin a si ti hi kan philh ding a si lo.
Budang cu
an tho i an tlu than RC Bupi cu thangchiatnak le mualphonak tampi a ton
sehmanhsehlaw, nihin ni kum cung lei tiang fek ngai le, a
fekbik mi Institute pakhat in a dir peng ko. Cu caah lamkaltu hna chan bang
kannih zong Lamkaltu le Nu Mary hna an i pumhnak Bupi in chuak ding cu kan mang
hmanh kan manh ding a si lo.
Cun, “A
zummi hna an holh tikah khan midang aa pum vemi hna nih khan kanmah holh in an
holh, tiin an rak theih cio tikah khan an khuaruah a har ngaingai,” a ti.
Kanmah holh a ti tikah hmurka in a chuakmi holh lawng si loin kan tuahnak, kan
nunphung le kan thlacamnak in a chuakmi holh le kaa zong hi a si ve.
RC kan si hnu cu kan
hawi RC kha miphun dang le holh phundang a hmangmi sinah ah Thawng tha kan
chim tikah anmah an theih, an cohlang i an thlaihchanmi Nunphung, holh le ziaza
phung kan chim awk a si. Kan umtu ning le kan ziaza zoh in annih zong nih, “Hiti
in bia a chimmi hna hi Galilee mi, miphun dang mi, an si ko tung! Zeitindah kan
i chuahkehpimi holh le nunza cio holh le nung in kan dihlak in kan theih kun
hna?” ti an lung a duk ngaingai hna ve awk a si. Hihi kan
mission nganbik, Bupi dang nih an ngeih khawh lo mi a si.
Cun Thawng thabia ah a
ti bang in RC kan si paoh cu cunglei he pumkhat lungthin khat kan si a hau.
Minung ti cu a tling dihmi le sualphawt awk a ngei lo mi kan um bal lo. Cu a si
caah mi pakhat cu cunglei maw, siloah, zapi nih maw hnatlak i thim i
thlacampiak nak in Aana pek hnu cu a chimmi le a hruainak cu kan zapi kan zulh
a hau. Khakha Thumkomh Pathian nun ning le Thiang Thlarau hruai ning le RC kal
ning a si. Kha hruainak in a piak, aa fimter tukmi cu Judas Iscariot bang le,
Matin Luther le a dangdang Bupi thennak a chuahpi mi hna bang kan pial kan tla
peng ko lai.
Cucaah dawtmi Pathian
fale hna, RC fale hna kan Pathian bianing le Lamkaltu le Nu Mary hna keneh zulh
in kan mission, mi vialte khamhnak rian cu Thiang Thlarau umpinak he pehzom hna
usih. Thiang Thlarau umpinak cu nanmah he um zungzal ko seh. Amen. Alleluia.
Fr. David Khin Hmung