DAWTNAK RIANTUAN

DAWTNAK RIANTUAN Rev. Fr. Paul             Kri nih, Bawipa, Bawipa, a ti mi paoh nih Pathian pennak ah an lut lai ti a si lo, vancung i a ummi ka Pa duhnak a tuahmi lawngnih Pathian pennak chungah an lut lai," a ti(Mt. 7:21). Cucu Patian lung tongin nunnak a si.             Pathian a duhnak tuah cu phunhnih in a um. Zumh awk bia vialte kha zumh le tuah awk bia vialte tuahnak a si. Zumhnak le tuahnak a si.             Bawi Jesu nih, "Pathian nih tuah seh ti an duhmi hna cu a thlahmi zumh kha a si," a ti(Jn. 6:29). Asi, Bawi Jesu Kri cu Pathian nih a rak thlahmi a Fapa ngeihchunh a si tiah kan zumh. Cun Pathian Fapa cu Pathian a si caah a cawnpiakmi vialte zong pakhat hmanh bau loin biatak a si tiah kan pawm dih. Thlacam zong kan i zuam, Sacrament hna zong kan hmuh lengmang. A thlah mi zumh cu mah vial a si ko cang lo maw? Khamhnak caah a za ko cang lo maw?             A tling rih lo, a za rih lo. Mahnak in tamdeuh tuah a hau rih. A nawlbia kha zulh a hau rih. Tuchan Krifa tampi nih nawlbia ti hi a theih in theih kan duh lo; tuahsernak ti zong theih an duh lo. An duhmi cu Bible ningin nun, asiloah, thawng`habia nun ti hi a si. Ziaza zong an duh lo, Nunnak lawng an duh. Nawlbia zulh a siloah tuahsernak cu palhnak nganbik ah an ruah i Bible nun a siloah Thawng`habia nun cu a sangbik ah an chiah. A ngaite ah cun pakhat te a si ko. Aa dang lo.             Ti le rawl cu nunnak a nun awk caah a si i thlacamnak le sacrament hna cu thlarau nunnak a nun awk caah a si. Ti le rawl kha `ha tein a ei a dingmi nih a ngan a dam i pumsa caah rian a `uan khawh bantuk in thlacamnak le sacrament hna `ha tein a tuah a hmang lengmang mi cu a thlarau nunnak caah rian a `uan khawh. Zumhnak ah a nung kho. Kri nunnak ngeih lo cu Pathian duhnak tuahnak ah a lang. Phundang in cun a nawlbia asiloah Thawng`habia nunnak ah a lang. Kri nunah hnuk ding liomi a si maw, a siloah, nu tling pa tling a si cang maw ti cu hi bantuk in theih khawh a si, khuamui chung i a nung mi maw ceunak chung i anung mi ti a lang lai(Eph. 5:8-9, 11). Thei a tlaimi a si maw si lo ti a lang lai(Mk. 11:12-14).             Cucaah dawtnak rian`uan cu a herh. Kri nih nawlbia kha pahnih ah a `hen; Pathian dawt le innpa dawtnak in(Mk. 12:28-31). Pathian a daw mi nih a nawlbia kha a zulh bantuk in a innpa a dawmi nih a innpa cungah `hatlonak zeihmanh a tuah lo. Innpa dawtnak ti mi cu minung hawi cung dawtnak kha a si. Hi kongah Bawi Jesu a nawlbia cu keimah nih kan dawt hna bangin pakhat le pakhat i daw u, ti hi a si(Jn. 15:12).             Dawtnak rian`uan a herh ning kha biaceihnak ah kan hmuh; "Ka rawl a `am i rawl nan kan pek, ka ti a hal i ti nan ka pek, khual ka si nan ka tlunter, hnipuan ka ngei lo i nan ka pek, ka zaw i nan ka zohkhenh, thawng ka tla i nan ka len(Mt. 25:35-36).             India ram Kalkatta khua ah Daihnak Nobel laksawng hmumi Sister pakhat a um. A min cu Mother Teresa a si. Nikhat cu thlacamnak tuah awkah khua pakhat ah kal aa thawh. Tlanglawng in kal ding a si. Buda ah zingka tuante ah a phan. Buda zung tlanglawng lampawng hrawng khua a vun zoh tikah mi tampi an rilh liangluang kha a hmuh hna. Hnichia puanchia, rawl`am tihal le zawtfah buin an um ko kha a hmuh hna. A lungchung ah Bawi Jesu bia "Ka unau hna lak i a hmebik mi pakhat cung i nan tuahmi thil poh hi keimah cungah nan tuah a si," a ti mi kha a lung ah a hung pem i a caam peng ko. Anmah hna hi ka zohkhenh hna ahcun Bawi Jesu ka zohkhenh a si ko lai ti kha fiangte in a rak theih. Cucaah mah mi safak hna zohkhenh awkah a sister buin chuahnak nawl kha a hal hna.             Tangka piakhat hmanh lo in a chuak i mi sifak hna zohkhenhnak rian cu a thawk. A chuahni bakah khua chungah a va vak i an chuah cang ka in an nu le nih an hlonh mi ngakchia pakul le pakhat kha a char hna. A thaizing ah a chuak `han i a dang pakul kha a char `han hna. Anmah hna dangh awkah eidin awk le sii hna kha a hal chawm hna. Atu cu Bawi Jesu kha ka zoh ka khenh taktak cang a ti i a lung aa lawm ngaingai.             Nikhat cu aa chawh lengmang lio ah hmunthur an pumhnak hmun pakhat ah tarnu pakhat a rak rilh ko kha a hmuh. Tarnu cu a zengmi a si i a tho kho lo, a cawl kho lo. Rawl`am tihal le zawtfah bu in a cawl khawh lo caah zu hna nih an ra i an ei; cu bantuk in hngerte zong nih an ei ve. Mother Teresa nih a hmuh tikah "Maw Jesu" a ti i a thawh, a puak i sii-inn ah a kalpi.             Cu bantuk in a minung hawi cungah dawtnak a ngeih caah amah cu a nun lio hrimhrim ah "A nungmi Mithiangnu" tiah an auh `heu. Mother Teresa cu Kri cungah a nung i Kri zong a chung ah a nung ve. Cucu a dawtnak rian`uannak ah a lang.             Cucaah Kri nih a kan pekmi nunnak chung kan nunnak hnga le kan `hannak hnga caah thlacamnak, Sacrament hna hmuhnak le dawtnak rian`uan cu a herh ngaingai. Mah pathum chungah pakhat khat a bau ahcun nunnak ah a thei a tlai kho lai lo. Zeicatiah mah pathum hi pakhat le pakhat an i tlaih dih i an i `hen khawh lo caah a si.