THAWNGTHABIA

Thawngtha bia ( A Thiangbik Mi Thumkomh Pathian Puai ni)
Baibal relding mi- Deu 4:32-34,39-40; Ps 32:4-6,9,18-20,22; Rom
8:14-17; Mt 28:16-20.
Bawipa Jesuh Kri velngeihnak, Pa Pathian
dawtnak le Thiangthlarua i hawikomhnak cu nan cung um camcin ko seh
tiin hmasa bik in thlaza ka cam.
Dawtmi Krifa u le nau hna ni hin cu kan
theih cia bantuk in A Thiangbik mi Thumkomh Pathian (Most Holy
Trinity) puai asi. Kan hnu zarh kha Thiangthlarau puai asi i, zultu
hna nih zeitindah Thiangthlarau lak sawng an hmuh i thawngtha an chim
ti mi cu kan theih cang. Nihin ah kan Bupi nih Thumkomh Pathian pakhat
asi mi Pa, Fapa le Thiangthlarau puai a kan tuah piak. Cu caah hi puai
kan tuahnak ruang ah hin kan thlarau caah zeidah thazang kan lak lai
ti mi hi nihin kan rel mi Baibal chung ah kan zoh than lai. Catholic
Krifa hna nih thla kan cam fatinte vailamtah hmelchunhnak ah Pa le
Fapa le Thiangthlarau min in tiin kan thawk.

Cun tipil kan ing lio ah
Siangbawi nih Pa le Fapa le Thiangthlarau min in tiah tipil an kan
pek(Mt 28:19). Cubantuk tthiamtthiam in sualthlahnak kan tuah tikah
Pa le Fapa le Thiangthlarau min in tiin Siangbawi te nih thluachuah an
kan pek hoi. Thahchunhnak tam pi um ko lai nain, hi acung lei pathum
te hi kan zoh ah cun, Pa le Fapa le Thiangthlarau cu pa thum an si ko
nain Pathian sinak ah cun Pakhat lawng a si ti mi hi fiang tein hmuh
khawh asi.
Pa Pathian nih van le vawlei cu a ser. A
si nain, Pa Pathian nih hi a ser nak ah a kan duh piak mi cu mivialte
a mah he um tti awk hi asi. Sihmahsehlaw, mi nung nih Pa Pathian duh
lo mi thil kan tuah caah sualnak chung kan tlak. Cu sual nak chung
in kan luat nak hnga caah Fapa Pathian kha a rung thlah i a kan tlanh.
Fapa Pathian a si mi Bawi Jesuh nih mi vialte khamnak caah thawngtha
kha he tiah a rak chim ko nain, achim mi vialte cu minung thluak nih
thei dih le hngal dih kha a har. Cu caah Bawi Jesuh nih a chim mi bia
kha fiang tein kan theih khawh nak hnga caah Thiangthlarau a kan thlah
piak. Mi nung fim nak in kan thei kho lo mi kha Thiangthlarau nih a
kan theihter (Jn 16:7-8). Cu si caah, kham nak kan hmuh khawh nak ding
caah Pa le Fapa le Thiangthlarau rian ttuan nak cu a pek tlaih ti mi
cu a fiang. Hi bantuk in kham nak caah then kho asi lo ning kha kan
Bupi nih atheih caah nihin hi Thumkomh Pathian kha special deuh in
upat pek ni ah a kan tuah piak mi a si.
Nihin kan rel mi Baibal Deutronomy chung kan
hmuh mi cu, Moses nih Pa Pathian nih zei tluk indah Isreal mi phun
cung ah a tha ti kha a chim hna i, Pathian cung ah zumhfeknak an ngeih
nak hnga caah ah a cawn piak nak kong kan theih. Pathian nih a fial mi
Moses bia kha an rak ngai ruang ah Isreal mi hna cu luat nak an hmuh
i Pathian kamh mi ram kha an phan. Mithiang Paul zong nih a ti mi cu
“Thiangthlarau nih an hruai hna ah cun Pathian fa nan si lai” tiah a
kan ti. Hibantuk in a sunglawi mi Pathian kamh mi ram, Pathian fa si
ding hi kan Bawipa Jesuh nih mivialte pek a kan duh caah “ va kal u
law mi vialte kha thawngthabia va chim u, a zum mi kha Pa le Fapa le
Thiangthlarau min in tipil nan va pek lai” tiah a kan ti nak hi a si.
Pa le Fapa le Thiangthlarau cu Thumkomh in Pathian pakhat asi bantuk
in kan mah vialte zong pumkhat le thinlung khat in kan si
khawhnakhngah thlacam u si.
Sunparnak cu Pa le Fapa le Thiangthlarau
cung ah um ko seh ,hramthawk lio can bantuk in atu le a zungzal um ko
seh, dong hin lo in. Amen

Fr. Michael Van Lian