August 2, 2015 Sunday

GOSPEL READING Jn 6:24–35

24Mizapi nih cun khika ah Jesuh siseh a zultu si hna seh an um lo ti kha an hmuh tikah lawng khan Kapernaum khua ah cun an kal i amah cu an va kawl.

25Mi nih khan rili khattelei ral i Jesuh cu an va hmuh tikah, “Saya, zeitik ah dah hika hi na phak?” tiah an ti.

26Jesuh nih cun, “Biatak kan chimh hna: nan ka kawl hi ṭhawnnak in ka tuahmi thil nan hngalh caah khan a si lo; nan duh zat in changreu nan ei caah khan a si ko. 27Hi a rawk khomi rawl caah hin ṭuan hlah ngat u, a hmunmi rawl, zungzal nunnak rawl caah ta nan ṭuan. Hi rawl cu Mi Fapa nih hin kan pek hna lai, zeicahtiah Pa a simi Pathian nih keimah cungah hin a lungsinak kha a khenh cang,” tiah a ti.

28Cucaah annih nih cun an thawh i, “Pathian nih ṭuan hna seh ti a kan duhning in kan ṭuan ahcun, zei hi dah kan ṭuan awk cu a si lai?” tiah an hal.

29Jesuh nih cun a leh hna i, “Pathian nih tuah hna seh ti an duhmi hna rian cu hihi a si: a thlahmi zumh hi,” tiah a ti hna.

30Annih nih, “Kan in zumh khawh nakhnga, zei hmelchunhnak dah na tuah lai? Kannih nih kan hmuh i kan in zumh nakhnga ding caah zeidah na tuah lai? 31Cathiang nih, ‘Ei awk changreu van in a pek hna,’ tiah a ti bantuk khan, kan pupa hna nih khan thetse ram ah manna kha an ei taktak,” tiah an ti. *

32Jesuh nih cun, “Biatak kan chimh hna: Moses nih a rak in pekmi hna kha cu vancung changreu kha a si lo, vancung changreu taktak an petu hna cu ka Pa hi a si. 33Zeicahtiah Pathian pekmi changreu cu vancung in a run thlahmi hi a si i amah nih cun vawlei hi nunnak kha a pek,” tiah a ti hna.

34“Bawipa, cu changreu cu kan pe zungzal tuah,” tiah an hal.

35Jesuh nih cun, “Nunnak changreu cu keimah hi ka si. Ka sin i a rami cu ahohmanh an rawl a ṭam lai lo i keimah a ka zummi cu ahohmanh an ti a hal lai lo. 36Sihmanhsehlaw ka chim bang khan, a hmuh cu nan ka hmu cang ko nain nan ka zum duh lo. 37Ka Pa i a ka pekmi paohpaoh cu ka sinah an ra lai i ka sin i a rami paohpaoh cu ahohmanh ka dawn hna lai lo. 38Zeicahtiah vancung in ka rung ṭum cu keimah duhnak tuah awkah khan si loin a ka thlahtu duhnak tuah awkah khan a si deuh. 39A ka thlahtu nih tuah seh ti a ka duhmi cu hihi a si: a ka pekmi vialte kha pakhat hmanh thlau loin, ni hmanung bik ni ah nunnak i an dihlak in thawhter dih kha a si. 40Zeicahtiah Fapa kha a ka hmu i a ka zummi paohpaoh cu ni hmanung bik ni ah nunnak i thawhter kha ka Pa nih a duhmi cu a si,” a ti.

THAWNGTHABIA

Solemnity Of Corpus Christi

Asunglawimi Bawipa Thi le Sa Puai

Khrih chung i dawtmi u le nau, mingnung khamhnak caah aherh bikmi cu Jesuh Khrih zumhnak hi a si. Zumhnak kan ngeihnu ahcun, Jesuh nih a kan cah takmi nunzia he khrihfa kan sinak kha langhter a hau. Khrihfa zumtu hna caah a biapibik mi thlarau nunnak kha Khrih nih a chiahtakmi cu Amah Thi le Sa a si. Cuasi caah, a sunglawimi Bawipa Thi le Sa cu khrihfa hna caah a hrampi le a sangcemmi pakhat ah a cang. Vawleicung i khual atlawngliomi khrifahna caah a thiambikmi doctor Jesuh nih a kan pekmi sii cu Amah Thi le Sa a si i thlarau nunnak caah eiawk hrimhrim cu asi. Cu ruangah, Khrih nih a kan chimmi cu ‚Keimah cu vancungram in a rungtummi nunnak changreu ka si, ka thi le sa a eilotu nih cun zungzal nunnak an ngah kho lai lo‛ (cf; Jn 6:41;53) a kan ti. Jesuh he pumkhat taktak si a duhtu pawlnih cun Amah Thi le Sa kha ei le ding hrimhrim a herh. Kan eilo i kan dinglo a siahcun Amah he pumkhat taktak kan sikho lailo. Amah he pumkhat taktak kan silo ahcun Amah he zungzal nunnak kan co kho lai lo tinak a si.