Khrih he thotthan ding izuam hna usih.

Thawngttha Bia        Mate, 28:1-10
   
       Thawhtthan thawngttha hi zei dah a si tihi khua sau pi ka ruat. Fawi
le bai in ka hmu lo. Ka lungchung a hung chuak mi cu thil pakhat hi
thawngttha tak a si ahcun kan lung a lut ding i kan nunnak a kan thlen
ding a si ka ti. Asinain voi tam pi cu thawngttha kan ti mi hi
nuamngai in kan ngaih hna i cutin kan chiah ton hna. Kei nih cun hiti
hi ka pom mi a si lo. Thawngttha a si tak ahcun  kan nunnak a kan
thlen ding a si ka ti. Cu caah homily ttial hi rian har pipi ah aa
cang. Cu caah kei ka ca thawngttha a si mi kan hrawm ve hna lai.


1. Kan Bawipa a thawhtthannak cu Pathian Bia i teinak ni a si.
   
      Vawlei tuanbia le Bible tuanbia kan zoh tikah ah minung hi chimh har
ngai mi bak kan si. U Hrat Hmung nih, ‘Kan dam can ahcun thithiam lo
bang’ ti hlah a phan bang in kan dam lio, vawlei kan nun lio cu a thi
lai lo mi bang, Vancung a um lo mi bang tlawnlen kan duh. Pathian Bia
nih thihnak a um, thawhtthannak a um, cun Vancung a um a ti mi hi
zarang nih kan zumh duh lo. Sinain kan Bawipa i a thawhtthannak nih
hin kan Pathian nih a kan chimh mi thawhtthannak le Vancung kainak
timi bia le a dang kan Pathian Bia vialte hi an hman ti hi a langhter,
a fekter. Cu caah thawhtthannak cu Pathian Bia teinak a hmuh ni kan ti
kho.
2.  Kan Bawipa a thawhtthannak cu dawtnak i teinak a si.
   
       Mithiang pawl a chim bang in thawhtthannak nih hin, Dawtnak cu a thi
thiam lo tinak hi a langhter. Kan Bawipa cu dawtnak Pathian fapa a si
i amah zong a nunchung dawtnak kong lawng a phuang i dawtnak rian
lawng a ttuan. Amah a pennak cu dawtnak pennak le uknak a si.
Sihmanhsehlaw, tuchan bang in hlanchan zong ah dawtnak kong a phuangmi
hrawitu tampi le uktu tampi cu a chungtak in dawtnak an ngei lo caah
dawtnak a tuahmi, kan Bawipa cu an huat i an thah. Asinain  Dawtnak cu
an thah kho lo. A thotthan. Kan thih hnu a kan nuntertu le a kan
thawhttertthan tu cu kan ngeimi dawtnak hi a si lai.  Cu caah
thawhtthan cu dawtnak nih teinak a hmuh ni kan ti kho tthan.

3. Kan Bawipa a thawhtthannak cu dinnak i teinak a si.

    Voitampi kan theih kan ruat tonmi cu kan Bawipa cu misual hna caah a
pum aa pe ti hi a si. Ahman ve ko. Sihmanhsehlaw, khatta lei ah a
biapi ngai mi a um ve mi cu kan Bawipa cu dinnak kha a phuan, dinnak
ca a ttuan caah dinnak a duh lo mi, micung ah ding lo in a nun i anmah
ca lawng a nunmi tlangbawi hna le pharasi pawl (biaknak lei hrawitu
pawl) nih an thah ti hi a si. Kan Bawipa cu dinnak kha a phuang i a
nunpi tik ah anmah an thah ahcun anmah an dinlonak kha minih an theih
lai lo i an him lai an ti caah an thah. Sihmanhsehlaw, Pathian a duhmi
cu kha tin a si lo caah a fapa a thawhtertthannak thawng in an
khuakhannak kha a hrawh piak hna i dinnak a vakpimi a fapa kha teinak
a pek. Cu caah thawhtthan cu dinnak nih teinak a hmuh ni kan ti kho.
   
       Cu caah kan Khrih i thawhtthannak ah kan i hrawm ve kho nak hnga,
Pathian bia kha zumh, dawtnak ngei i ttih lo in dinnak kha phuang in
tuah hna u sih.

--
Fr.David Khin Hmung
Rector of LWMPT Minor seminary
H.No, 115, Turiya Road.Thazin 4,
Kalaymyo, Sagaing Division,
Myanmar
fdvhmung@gmail.com
phone, 0947073095