6th Sunday of Easter
A voikhat Bible relnak - Lamkaltu 10:25-26.34-35.44-48
Salm 98:1.2-3.3-4
A voihnih Bible relnak – 1Johan 4:7-10
Alleluia – Johan14:23
Gospel – Johan 15:9-17
Dawtmi
Khrihfa nu le pa, u le nau hna catholic Bupi kal ningah tu tan cu Bawi Jesuh
Khrih a thawh`han hnu a zarhruk nak kan phang hna cang. Tu zarh kan rel mi
Bible hna hi kan zoh hna a si tik ah cun Pa Pathian nih Fapa Jesuh dawtnak le
Fapa nih a zultu kan nih vialte hna a kan dawtnak; “Dawtnak in pakhat le
pakhat” kan i pehtlaihnak kong kha kan hmuh.
Nai kan dum chung kaa chawh pah in a hmui ngai
mi rim pakhat ka theih. Ka pawngkam hrawng ka hei ngiat ah khin, rose pangpar a
bor `ha ngai mi, aa dawh ngai mi a par ko kha ka hmuh.
Zeidang ruat ti lo in
pangpar um nak lei cu ka hei panh ko. Chitkhat te cu arko in pangpar lawng cu
zei thei lo in ka hei zoh. Ka pawng kam zong `hatein ka van ngiat `han tikah,
pelep le khuai hna zong nih pangpar cu an rak tlenh len ko kha ka hei hmuh
fawn. Cu lio te ah ka lung chung in ruah nak pakhat a chuak mi cu:
“ Aw . . . . . . rimhmuihnak nih zeitluk in dah a kan
dawhter khawh ko. Pangpar rimhmui hna zong nih minung lawng si lo in, pawngkam
thing ram hna zong a dawhter hlei ah, satil, pelep le va phunphun hna hmanh nih
an buut i an tlanh ko hih. Kan nih Khrihfa hna zong nih Bawi Jesuh rim in kan
hmui tak ve kho ko hnga maw?”
Tu
chan kan nih Khrihfa hna phunglam le kan kal ning kan van zoh `han a si tikah “Kan
rim a hmui maw, a Khaa dah? Kan zumhnak kan nunning ah Khrih rim kan hmui
hna maw? Khrih rim kan hmui lo a si ah cun, a ho rim dah kan nam, kan hmui
hnga? Khrih rim kan hmui lo a si ah cun Khrih he a ral chan mi satan rim kan
hmui a si ko lai. Satan rim kan hmui a si ah cun satan nih a kan tlanh ko lai.”
Vawlei
cung kan nun caan tawite chungah hin, kan “Nun-par” “Bawipa duhnak in nun” he a
ral chan in kan um, kan nun a si ah cun, a man cu “Thihnak” si ko
lai. Zeicah tiah cun, kan cungah satan rim a hmui caah a si ko.
Khrih
rim kan cungah a hmui a si ah cun, zeizong vialte sertu Pa Pathian nih a kan
tlenh lai i a thluachuah vel lak sawng tampi he a kan um pi zungzal ko lai.
Khrih rim hmuih man cu, hi vawlei cungah Pathian thluachuah let 30,60,100 le
van thluachuah zungzal nun-nuamhnak vancung “Ro” laksawng pek kan si ko
lai. A ho rim dah kan hmuih?
Jesuh
Khrih nih, “Kei ka nawl bia cu hi hi a si. Keimah nih kan dawt hna bantukte hin
pakhat le pakhat i daw u (Jn 15:12)”. Mithiang Johan nih a cakuat ah hitihin a
ti `han. “Pathian cu dawtnak a si” (1Jn 4:8). Khrihfa kan sinak ah Khrih tehte
`ha si hna u sih. Khrih nih a kan fial mi (Mission) rianpi cu kan nun-nak ah
hin langhter hna u sih. Kan mit in siseh, kan chimrel nak in siseh, kan ruahnak
in siseh, kan tuahsernak in siseh, Bawipa Jesuh Khrih i a dawt nak kha langhter
hna u sih. A dawtnak kan langhter cu Pathian kan langhter a si. Pathian kan
langhter cu Pathian kan sinah a um ruangah a si. Pathian kan sin
a um ah cun kan nunnak ah hin thluachuah nih a kan um pi i kan “nun”
cu thluachuah rim, “Pathian rim kan hmuih ” a si.A ho rim dah kan hmuih?
By;
Fr. Fidelis Mg Sein