Luke 14;11 Amah le amah a ngan ah aa chiami cu nauta ah chiah a si lai
i mi tangah aa dormi cu mi ngan ah ser a si lai,” tiah a ti.
Nihin ah kan rel kan theihmi Thawngtthabia chungin a muru cu
toidornak a si. Pathian nih toidornak ngei dingah a kan cawnpiak hna.
Toidornak ngei dingah toidornak timi biafang cu kan i theih fiang
hmasa a hau. Toidornak timi biafang cu theih fiang dingah Chin
Dictionary ( Laihold) cu ka kau.
Chin Dictionary (Laihold) ah “toidornak cu mi nih sersat, soisel len
ko zongah let loin um khawh, upat pek peng, in khawh i mi tang um ka
si tinak thinlung ngeih khawhnak tiah” biafang sullam aa ttial. Hi
toidornak sullam hi a palh tiah ka ti lo nakin kanmah Krifa caah
toidornak sullam cu hi bantuk sullam cu a si deuh lo. Mi tang um ka
si tinak thinlung ngeihnak cu kanmah krifa caah toidornak kan ti lem
lo. A nuam bik tthutdan ah tthu zongah krifa caah toidornak a si lem
lo.
A si ah kanmah Krifa caah toidor cu zeidah a si? Kanmah Krifa caah
toidornak cu kan sinnak i hngalh kho i kan sinak i lehkhan khawhnak tu
a si. “Keimah cu Pathian nih sermi minung pakhat ka si.Pathian nih ka
nunnak cu a ka pek. Pathian nih ka nunnak caah ka herhmi vialte a ka
pek dih. Kan ngeimi thil vialte hi Pathian sinin hmuhmi a si. Ka pum
le ka thaw hmanh hi Pathian sinin hmuhmi a si. Pathian fa ka si.
Pathian rianttuantu ka si,” tiah kan sinak cu kan hmuhnak le i
lehkhannak cu toidornak tiah kan ti.
Nu Mary i a ngeimi toidornak cu Pathian nawl ngaihnak in a langhter
ve. Vancungmi nih Mary sinah Jesuh a hrin lainak thawng an rak tthanh
tikah Mary nih Vancungmi cu ,“ Kei cu Bawipa salnu ka si ko, na chim
bang cun ka cungah si ko seh, (Luke 1; 38)” tiah a ti hna. Mary cu a
rak ngeimi toidornak ruangah ah nihin ah kan nu sinak tiang Pathian
nih a cuai sanh
Khamhtu Jesuh zong nih a ngeimi toidornak cu Pa nawl ngaihnak ah
thihnak tiang tuar in a langhter ve. Khamhtu Jesuh cu a sinak
fiangtein aa theih, Pathian nih a pekmi a mission fiangtein aa theih.
A sinak cu fiangtein aa theih ruangah a Pa nawl ngaihnak ah thihnak
tuar in aa toidornak cu a langter mi a si.
Cu caah krifa hna caah toidornak cu kan sinak i theih i Pathian nawl
ngeihnak, Pathian riantuannak ah kan langhter ve ding a si.
Dawtmi zumhtu hna, kan nunnak cu kanmah ca lawngah sihram hlah seh,
Pathian nih a kan pekmi thil vialte cu kanmah ca lawngah sihram hlah
seh. Pathian caah le a mi hna caah si ve hram seh. Amen.
Fr. John Mang Peng,
Trai Tara Zaung,
Cambodia.