“Ahohmanh leithuan aa ot i hnulei a zoh peng ṭungmi cu Pathian Pennak caah santlaihnak a ngei lo ( Luke 9:62)”.
A kan lehkhan lomi cungah nunning:
Nihin thawngtthabia Luke 9:51- 55 tiang kan rel tikah a
kan lehkhan lomi mi hna cungah nunning lam phunhnih kan hmuh kho. A
pakhatnak nunning cu Jesuh zultu a simi James le Johan nunning a si.
Jeim le Johan hna nih anmah a lehkhan lomi mi hna cungah lungfahnak he
thil that loin lehrul duhnak nunnak an ngei. Jeim le Johan hna cu Jesuh
he i Jerusalem khua lei kal awkah khan aa thawh. A hmaiah khan lamkal a
thlah hna i cu hna cu an rak kal i Samaria mi hna khua pakhat ah khan
zeizong vialte rak timh chung awkah an rak lut. Sihmanhsehlaw Jerusalem i
a kal lai kha a fian ko caah cuka khuami hna nih cun tluninn kha onh an
rak duh lo. Cu thil cu a zultu hna Jeim le Johan nih khan an hmuh
tikah, “Bawipa, hi mi hna hrawhnak ding caah hin vancung in mei au u
tiah na kan duh maw?” an ti.
A pahnihnak nunning cu Jesuh
nunning a si. Jesuh nih cun a zultu hna he khual an tlawng tikah anmah a
lehkhan lomi mi hna cungah dawtnak a ngei peng caah anmah cungah that
lonak a tlung hnga ding a siang hna lo. Cu caah Jeim le Johna hna nih
anmah a lehkhan lomi hna cungah that lonak tlungter dingah a sinah an
chim tikah aa mer i a sik hna.
Nangmah le keimah ta kanmah a kan
lehkhan lomi hna cungah kan nunnak zeitin a si? Jeim le Johan nunnak maw
kan ngei sual? A silo ah Jesuh nunnak maw kan ngei?
Pathian riantuantu phunghnih:
Leicung ah Pathian rianttuantu tampi um a si cu chim hau
loin theih a si ko. Nihin thawngttabia Luke 9: 57- 62 tiang kan peh rel
tthan tikah Pathian rianttuantu hna phung hnih kan hmuh hna: (1) Pathian
sinah a rian thiang ttuan dingah amah pumpak in a nawlmi Pathian
rianttuantu hna le (2) Pathian nih amah duh ning bangin a rian ttuan
dingah a auhmi Pathian rianttuantu hna ti an si.
(1) Pathian sinah a rian thiang ttuan dingah amah pumpak in a nawlmi Pathian rianttuantu:
A
phunkhatnak Pathian rianttuantu cu amah pumpak in Pathian sinah Pathian
rian ttuan dingah a nawlmi pa a si. Jesuh cu a zultu he khua dangah an
kal lengmang lio ah a pakhatnak Pathian rian a ttuan duhmi pa, pakhat
pa nih a thawh i, “Na kalnak paoh ah kan zulh lai,” tiah a ti. Hi pa nih
zeiruangah dah Pathian rian a ttuan duh hnga tiah biahalnak tuah ning
law a leh a har tuk ko lai. “Jesuh zong nih zeiruang ah dah zulh na ka
duh,” tiah hal lo tein amah nunnak le amah zultu hna an zulh hnga dingmi
nunnak tu cu fiangtein a chim, “Cenghngia nih kua an ngei i vate nih bu
an ngei, sihmanhsehlaw Mi Fapa cu riahnak hmun hmanh ka ngei lo (Luke
9: 57),” tiah a ti.
A pahnihnak pa, Pathian rian ttuan duhmi pa
nihcun Jesuh hnu zulh a duh ngaingai ko nain amah thinglung chungah rian
a ngeimi dih hmasa hnu ah Jesuh hnu zulh dingah aa timh.Cu caah Jesuh
cu a thawh ve i, “Bawipa kan zulh lai, sihmanhsehlaw ka chungle kha dam
tein, va ti ta hna ning,” tiah a ti ve. Jesuh zong nih hmasa pa bangin,
“Zeiruangah dah ka hnu na ka zulh duh,” tiah bia a hal ve lo. Amah hnu
zultu hna i nungning lawng fiangtein a chim ve,“Ahohmanh leithuan aa ot i
hnulei a zoh peng ṭungmi cu Pathian Pennak caah santlaihnak a ngei lo (
Luke 9:62),” tiah a ti. Jesuh nih amah hnu zulh dingah a zeizawng
vialte kaltak in Jesuh hnu lawng zulh colh dingah zultu nunning a
cawnpiak.
(2) Pathian nih amah duh ning bangin a rian ttuan dingah a auhmi Pathian rianttuantu:
A
phunhnihnak Pathian rian ttuantu cu Jesuh pumpak nih auhmi pa a si.
Jesuh nih cu pa cu a thawh i, “Ka zul,” tiah a ti. Jesuh nih, “ Na ka
zulh duh maw,” tiah biahalnak a tuah lo. Amah duh bangin cu pa cu, “Ka
zulh,” tiah a ti. Cu pa nihcun Jesuh auhnak cu a lehkhan ko. Jesuh hnu
zulh cu a duh ko. Asinain Jesuh hnu zulh hlan ah a pa va vui ta a duh.
Cu caah Jesuh cu a thawh i, “Bawipa, ka pa kha va vui ta ning
(Luke:9:59),” tiah a ti. Jesuh nih amah hnu zulh dingah a auhmi pa cu
direct in a hnu zulh colh dingah a auh ve. A pa va vui ta dingah khonh
pek loin Pathian Pennak kong tu va chim dingah a auhnak cu a fehter
chin. Jesuh nih cun a leh i, “Mithi nih an mithi kha va vui ko hna seh.
Nang tu cu va kal law Pathian Pennak kong kha va chim ko,” tiah a ti.
Zumhtu kan nunnak ah Pathian rian cu a pakhatnak rian a si:
Leicung ah mi vialte cu Pathian rian thiang ah i tel cio
in ttuan cio a si. Krifa kan si zongah krifa an si lo zongah Pathian
rian a simi dawtnak rian cu kan ttuan cio ve. Kan thinlung chung cio ah
thil ttha tuah dingah Pathian bia a nung. Abik in kanmah Krifa hna
chinchin cu thiltha tuahnak ah Kri hnu zulh dingah kan thinlung chungah
Pathian bia a zungzal in a nung peng. Cuti Kri hnu kan zulhnak cu a
zeizawng vialte nakin a pakhatnak chiah dingah auhmi kan si. Jesuh nih a
Pa nawl ngaihnak ah a lut chiatnak hmanh hmun ngei loin a Pa rian cu a
ttuan.
Kri nunnak i lak loin kanmah minung nunnak lawngin kan i
nungpi sual ahcun Jeim le Johan bangin siknak kan ton kho men ve.
Pathian rianttuan dingah kanmah pumpak in Pathian sinah a nawltu pa kan
si zongah asiloah Pathian pumpak nih amah rianttuan dingah auhmi kan si
zongah kan rian vialte lakah a pakhatnak rian cu Pathian rian a si.
Pathian rian cu a pakhatnak rian ngan bik ah kan chiah kho cio dingah
pakhat le pakhat ca cio ah Pathian sinin thluahchuah thar i halpiak cio
hram hna uh sih.
**************
Fr. John Mang Peng, Cambodia.