Bawi Kri ah dawtmi hna Chin Catholic Tuurun hna, rawl i hrawm le rawl pek timi biafang hna i a sullam cu a khatmi an lo nakin an i dang ngaingai . Rawl i hrawm timi biafang i a sullam cu cabuai pakhat ah a caan khat te ah rawl dumtti ti duhnak a si. Rawl ei sawmmi pa he sawmhtu pa he rawl cu ei tti a si. Asinain rawl pek timi biafang cu mi kha rawl ei awk ah serhpiak i ei ter a si. Cu caah rawl pekmi pa cu a paw a khim lio ah rawl a pektu pa cu a paw a ttam tawn. Nihin ah keimah zong nih thlarau rawl cu pektu dirhhmun in si loin nanmah he thlarau rawl ei tti tu dirhmun in Pathian bia cu i hrawm kan duh ve hna.
Mi a cheukhat nih bia an hal i, “Bawipa, mi hi tlawmte lawng maw khamh an si lai?” an ti. 24Jesuh nih a leh hna i, “Kutka bi chung khan lanh i zuam ko u, zeicahtiah hihi kan chimh hna: mi tampi cu luh an i zuam lai nain an lut kho lai lo” (Luka 13:23).
“Khamhnak hmuh dingah lanh kaa zuam dingmi kutka bi cu ka caah zeidah a si,” tiah biahalnak kaa tuah. Kutka bi theih loin kutka bi chung khan lanh izuam kho a si lai lo caah hi biahalnak cu kaa tuah hmasa nak a si. Kutka bi cu amah ning tein a um zungzal mi hmun asiloah thil a si. Kutka bi chungin lanh aa zuam dingmi pa, keimah cu ka cawlhcang a herh, kaa zuam a herhnak kong Pathian bia nih ka lungah bia a chim.
Khamhnak hmuh dingah lanh kaa zuam dingmi kutka bi cu ka caah Pathian duhnak tuah cu a si. Pathian duhnak tuah cu ka caah kutka bi taktak a si peng. Jonah bangin keimah duhnak tu tuah i Pathian duhnak tuah cu hnu ah ka chiah sual caan tampi a um cu kaa hmuh. Ni chir ka nunnak ah kutka bi ka hmuh hngalh lo caan tampi a um tawn. A sinain Pathian nih Jonah bangin ka nunnak cu aa ka zuah peng rih.
Dawtmi zumhtu hna, Pathian nih kan nunnak a kan zuahnak in a tinhmi cu a min thannak a thei rih lomi hna le ka lianhngannak le ṭhawnnak a hmu rih lomi miphun le ram hla pipi ah khan thlah i a lianhngannak kha kan chimh i miphun dang hna sin cun, a sinah laksawng ah, kan kirpi than hna lai ding caah a si.
Pathian fanu le fapa kan si bangin Pathian nih amah duhnak kha zulh i amah rian ttuan dingah a kan fial hna. Asinain Jonah bangin a nawl kan ngaih lo i kanmah pumsa duhnak lam kan zulh sual tikah Pathian nih kan nunnak cu zuah in a kan chim hrim ve tawn. Jonah bangin Pathian nih a kan dawt i harnak chungin kan nunnak cu a kan khamh tthannak in Pathian nih a lianngannak cu a kan hmuh sak ve tawn.
Cu caah Jonah bangin Pathian duhnak cu theih tthan i an kan fial bangin a nawl ngai in a mi hna cu a sinah kirpitu ah a kan hmang lehlam tthan peng nakhngak kan nunnak vialte cu kan Pa Pathian sinah i up hna u sih.
Jonah tuanbia a tawinak in a rel duhmi hna caah:
Jonah tuanbia a tawinak in zoh than ta u sih. “Pathian nih Jonah cu, “Nineveh khualipi ah cun va kal tuah, atu ah va kal law a ṭhat lonak nih khan a cerh in a ka cerh caah va si,” tiah a ti. Sihmanhsehlaw Jonah cu Bawipa sinin zam awkah khan Joppa khua ah khan a va kal i khika ah Tarshish khua lei i a kal dingmi lawng pakhat kha aa cit i Bawipa nih a phak khawh lonak Tarshish khua ah khan, cu lawng cun ka kal lai, tiah a ruah. Sihmanhsehlaw Bawipa nih thlichia a hranter cimmam i rili tilet cu a san tuk caah lawng cu kuai dih hnik aa zal. Jonah ruangah thlichia a hran kha an ngalh tikah Jonah cu an i lak i rili chungah cun an hlonh. Bawipa nih Jonah cu nga nganpi kha a dolhter i nga paw chungah cun ni thum le zan thum a um. Bawipa nih nga sinah cun bia a chim i nga nih cun Jonah cu tikam ah a luak.
Bawipa bia cu Jonah sinah a voi hnihnak a phan ṭhan i, “Nineveh khualipi ah cun va kal cang law kan chimhmi bia cu va thanh tuah hna,” tiah a ti. Cucaah Jonah cu aa tim i Bawipa nih a chimh bangin Nineveh khua ah cun a kal. 4Jonah cu khuapi chungah cun a va lut i ni khat a kal hnuah khin, “Hi hnu ni sawm li chungah Nineveh hi a rawk lai!” tiah a au. Nineveh khuami nih cun Pathian bia cu an zumh. Zapi rawl ulhnak kan tuah lai i a hme bik in a ngan bik tiang, a mi kip nih buri kan i hruk lai, an ti. Cu thawng cu Nineveh khua siangpahrang nih a rak theih tikah a bawiṭhutdan cung khan a tho i a siangpahrang puan kha aa phoih i buri kha aa aih i vutcam lakah a ṭhu. . Pathian nih an tuahmi kha a hmuh i an ziaza ṭhalo an hlawt kha a hmuh tikah aa ngaihchih i an cungah ka tlunter lai a timi ṭhat lonak kha a tlunter ṭhan lo.( Jonah 1:1 – 3:1-10).”
Fr. John Mang Peng, Kohkung, Cambodia.