Thawngthabia

“Jesuh Kri thawngin sualnak leiba ngaithiam kan sinak”

41Jesuh nih cun, “Tangka cawihtupa sinah lei a bami pahnih an um. Pakhat nih ngun tangka za nga a bat i a dang pakhat nih sawm nga a bat. 42An pahnih tein an cham kho veve lo, cucaah a ngaihthiam hna. A si ahcun, aho nih khan dah amah cu a dawt deuh lai?” tiah a ti. 43Simon nih cun a thawh i, “Ka ruahnak ah, tam deuh a ngaihthiammi nih khan ta a dawt deuh lai,” tiah a leh. “Na hmaan,” tiah Jesuh nih a ti (Luke 7: 41- 43).

Bawi Kri ah dawtmi Nu le Pa, U le Nau hna, nihin kan relmi thawngtthabia nih kan thlarau damnak kan pek tthan hram hna seh tiah thlaza ka cam hmasa.  Nihin thawngtthabia nih nunnak phungthum a kan piak. Cu nunnak hna cu (1) Jesuh Kri rawl ei sawmhtu Farasi nunnak, le (2) a sualmi nu pakhat nunnak, le (3) Jesuh nunnak ti an si. An nunnak hna cu a tanglei bangin fiang deuh in zoh peh hna u sih:

(1) Jesuh Kri rawl ei sawmhtu Farasi nunnak:

                Thawngtthabia ah kan hmuhmi Farasi pa cu misual pakhat a si bangin Jesuh sinah sualnak leiba a ngeimi pa pakhat a si.  Bawipa sinin sualnak leiba ngaithiammi pakhat a si fawn. Nikhat cu Jesuh Kri cu a inn ah rawl ei a sawm. A sinain rawl ei a sawmmi Jesuh cu a sualnak ngaithiamtu, amah a khamtu Bawi a si tiah a zumh kho lo. Jesuh cu a inn ah rawl ei a sawmnak in thatnak pakhat a tuah len lio ah a inn ah Jesuh sinah dawtnak langter dingah a rami misual nu cu a thinlung in sual a phort len pah. A lung chungah a chimmi cu, ““Hi pa hi profet a si taktak ahcun amah a tawngtu nu hi ahodah a si i zeitluk a sualmi nu dah a si ti kha a hngalh lai,” tiah a ti. Amah sualnak aa hmuh kho lo hlei ah Jesuh zong khamtu tiah hmuh le zumh kho ti loin misual nu sualnak lawng cu a lung chungah a rak chuah cang. Cu a si caah a sualnak a ngaithiamtu, amah khamh awk ah a inn ah a rami, Jesuh cungah lawmhnak bia pek thiam ti lo.

(2) A sualmi nu pakhat nunnak:

                A sualmi nu cu mipi nih theihmi misual nu (a public sinner) pakhat a si. Jesuh sinah sualnak leiba a ngeimi a si ve. Bawipa sinin a sualnak leiba ngaithiammi nu pakhat a si ve. Jesuh cu amah khamhtu bawi a si tiah a zumhtu nu a si. A sualnak aa hmuh khotu nu a si. Mi sualnak a hmuhmi nu si loin amah sualnak le khamhtu Jesuh lawng a hmuhmi nu a si. Nikhat cu Jesuh nih Farasi inn ah rawl hrawng a ra ti thawng a theih tikah Jesuh sinah a sualnak ritpi cu phorh in a mithli he a va kal. “Lungrang thawl pakhat a khat tein zihmui a ummi kha aa put i Jesuh hnulei ah cun a kehram ah khan a dir, a ṭap i a mitthli in a ke kha a cinter. Cun a ke i a mitthli cu a sam khan a hnawh i a hnamh hna i zihmui kha a toih hna (cf.Luke 7: 37-38). Cu ti cun sualnak a ngaithiamtu, amah khamhtu Jesuh sinah a dawtnak le aa lawmhnak cu a langhter.

(3) Jesuh nunnak:

                Jesuh cu mi vialte cungah dawtnak ngeitu a si  bangin mi vialte sualnak a ngaithiamtu Bawi a si. A cungah sualnak leiba a cham kho lomi  Farasi pa i a sualnak a ngaithiam bangin a sualmi nu i sualnak zong a  ngaithiam ve. Mi sualnak a hmuh ning bang in a ngaithiamtu Bawi a si. Sualnak leiba a tam le a tlawm a tuaktan lomi sualnak leiba vialte ngaithiamnak lawng a theihmi Khamhtu Bawi a si.

Kri nih an kan cawnpiak mi nunnak:

                Krifa kan nunnak ah a cungah ka langter mi nunnak hna chungin a ho nunnak dah kan i i nungpi tawn? Farasi pa nunnak maw? asiloah a sualmi nu nunnak maw? Asiloah Khamhtu Bawi Jesuh nunnak maw? Krifa cheukhat hna kan nunnak ah a cungah ka langhtermi nunnak pathum hi kemh dih in kan i nunpi tawn. A caan caah Farasi pa nunnak kan i lak i a caan caan ah misual nu nunnak kan lak ve bangin a caan caan ah Khamhtu Jesuh nunnak zong kan i lak tawn ve.

Farasi pa nunnak kan ilak caan ah mi sualnak lawng kan hmuh i kan sualnak kan i hmuh kho lo hlei ah sualnak ngaithiamtu Jesuh Kri zong kan hmuh kho lo. A sualmi nu nunnak kan i lak caan ah misualnak hmuh kho loin kanmah sualnak le kan sualnak ngaithiamtu, Jesuh Kri cu kan hmuh hna nain kan cungah sualnak a tuahmi kan ngaithiam kho lo caan a um ve. Cun Jeush Kri nunnak kan ilak caan ah midin kan si i kan cungah sualnak a tuahmi hna kan ngaithiam ve tawn hna.

                Nihin Bawi Jesuh Kri nih a ka cawnpiak mi chungah Farasi pa nunnak cu a ttha lo caah hlawnh hrimhrim a herh i a sualmi nu nunnak le amah nunnak tu i nunpi dingah a kan cawnpiak. Farasi pa bangin kan sualnak leiba chungin a kan khamhtu Bawi Kri theih lo le zumh lo cu a kan duhpi lo. A sualmi nu bangin mi sual a simi kanmah zong kan sualnak i theih i mi sualnak zoh lo le cun kan sualnak leiba vialte a kan ngaithiam pengtu a kan khamhtu Bawi Kri theih le zumh dingah a kan cawnpiak, a kan duhpi. Cun lawng si loin kan sualnak leiba vialte a kan ngaithiamtu, Bawi Kri bangin kan cungah sualnak le palhnak a tuahmi hna zong dawtnak khat he ngaithiam dingah a kan cawnpiak ve. 

                Bawi Kri ah dawtmi zumhtu hna, kan i nunpi tawnmi Farasi pa nunnak cu hlawnh in misual kan si bangin a sualmi nu nunnak le Jesuh a nunnak hna tu i nunpi kho dingah thlacamnak he thazaang thar Pathian sinin lak kho izuam hram uh sih.

                          Pathian nih nan cung cio le nan chungkhar cio ah a thar in thluachuah thar rak in pek cio hram hna seh. Amen.

                                                                                                 

Fr. John Mang Peng, Cambodia.