Baibal tlaang: Lk 19:28-40 (Jerusalem ah Sunglawi ngaiin a lut)
Nan hmai khua ah khin rak kal ulaw nan va luhpah ah khin citbal rih
lomi laafa nan hmuh lai. Cucu a hri va phoih ulaw hika ah hin ratpi u.
Pakhatkhat nih, zeicahdah mah khakha a hri nan phoih? An in ti hna ah
cun, Bawipa nih a herh tiah va ti ko u tiah a ti hna…….Farasi mi a
cheukhat hna nih Jesuh cu an hun thaw hi, saya, na zultu hna hi
daihter hna tiah an ti. Jesuh nih cun a leh hna i, hi hna hi an daih
ah cun lung hrimhrim hi an au lai tiah a ti.
Dawtmi u le nau hna, hi a cung i Baibal tlang hi kan theih dih bantuk
in kan Bawipa Jesuh Khrih nih a nun chung ah sunglawi ngaiin a
miphunhawi hna an chahbik nak hmun, an khualipi asi mi Jerusalem khua
ah sunparnak he a luh nak kong asi. Mirang pawl nih Palm Sunday an ti
i kan Lai holh in Kutchuk puai tiah direct in kan leh i, kei cu ka uar
lo ngai. Hmailei ah remh than te ding.
Chin Khrihfa tuanbia kan zohthan tikah a hramthawk ahcun kanpu le
kanpa le hna kha Khrih min ah an i daw hna i, lungrualte in rian an
rak tuan ti kho. Cu ti i an rak nun i rian an tuan ruang ah kan Lairam
zong ah Catholicbu hi a rak pumkarh i zumtu kan rak si hna hi a si.
Zumhnak lei i a hmasa kanpu le kanpa le hna nih an kan thih taak hnu
cun kan Lairam ah Catholic Khrifa kan i hruainak ah dawtnak a tumchuk
i a zor chin ti kha kan hmuh khawh. Cu ti a rak sinak cu mah leh khua
le miphun, peng le tlang calong ruah in um cio ruang ah a rak si.
Catholic lungput a tlau tik ah lungthin i thennak khuakip hmunkip ah a
um. Lungthin i then tikah khuachung i zatlang nun le riantuannak tiang
lungthin thennak kha a um.Cu hnu ah Pakhat le pakhat i thangchiat i
mawhchiat a si. Peng dangdang a si tikah i hawikomhnak le
riantuantinak zong a um ti lo. Pehtlaihnak le i chawnhbiak zong a um
ti lo. A dangdang pi bak in um le cawlcangh cio a si.
Hi vialte nih a langhter mi cu Peng le Tlang kan i then tikah kan
thinlung zong aa then dih i, dawtnak le remnak zong kan karlak ah a um
kho ti lo. Kanmah le kanmah kan i daw lo i kan i rem lo tikah kan
chung ah kan Bawipa Jesuh Khrih lunglawmhnak hi a um kho hnga maw timi
hi a ka ruahter ngai te. Kan Bawipa Jesuh Khrih lawng siloin Laimi a
kan daw i, Laimi caah a nunnak pek in rian a rak tuanmi hna kan
Siangbawi le zong hi an i lawm hnga maw tiah ka ruat ngai. An i lawm
lai ti ka zum lo. Cun dawtnak kan ngeih lo tikah miphun le ram ca le
Pathian le Khrihfabu caah thinlung khatte in riantuan tinak a um kho
ti lo. Nihin ni ah kan Lairam le kan Bupi caah a herh bikmi cu Bawi
Khrih min ah dawtnak le remnak he i hawikomhnak ngei in Pathian ca le
Khrihfabu caah riantuan ti ding hi a si. Kan Bupi hi kan dawt taktak
ko ahcun BawiKhrih min ah kan nih vialte dawtnak in hawikomhnak ngeih
ding le riantuantinak ngeih ding hi a biapi tuk in chiah in riantuanti
ding tu kha a si hnga. Cu tin riantuan khoh ding ah cun mahlei long
hoih lungput te kha kan hlawt hmasa a herh ko.
Bawi Jusuh nih Jerusalem khualipi luh ding aa timh tik ah Morden
sangmi Landcruser, Pajero le Prado Motor hna a herh lo, citbal rih lo
mi, phundang in kan chim ah cun a lee mi Laafate tu kha aa timh deuh.
Hremh rih lo mi Satil cu tongtham a har ngai, a ho hmanh nih ngam le
duh a si bal lo. Hman ngam zong an si lo. Na in, Bawipa nih a herh tik
ah cun a lee mi Laafate zong kha hman awk tlak ah a cang. Nang le kei
zong, milung khong le misual bik si hman usih law Bawipa nih a Bupi
caah a kan herh ti mi lungput kan ngei ve ah cun santlai mi kan si ve
ko lai. Nang le kei nih Bupi caah thazang kan chuah duh lo i kan i
zuam duh lo ah cun kan phawng i a um mi Lung hna nih fakpi in an kan
au hnawh can a phan te lai. Nan zate, Pathian nih thlua in chuah hram
hna seh!
Fr.Philip Za Hei Lian
Director of SIGNIS and RVA Chin Service
Hakha Diocease
Hakha, Chin State
Myanmar
Ph: 0095 949591591
Email: lianphilip@gmail.com