Pawngkam mi hna ruangah Kri ah nunnak thar

“Pawngkam mi hna ruangah Kri ah nunnak thar”

 

Jesuh nih, “Minu, khuazei ah dah an si dih? Nangmah sual phawtu dingah pakhat hmanh an tang kun lo maw?” tiah a ti.11Minu nih cun, “Bawipa, ahohmanh an tang lo,” tiah a leh.Cu tikah Jesuh nih, “Kei zong nih sual kan phaw ve lo. Vakal law a sual bel va sual ti hlah,”tiah a ti. (John 8:10-11)

           

Leicung ah minung sinak a rak lak mi poah nih nu le pa, u le nau, hawi le komh ti in pawngkam mi kan ngei. Kan pawngkam ah a um mi hna cu kanmah caah nunnak lam a kan piak tawn. Kan palhnak, kan sualnak, kan chambonak hna cu kanmah le kanmah kan i hmuhmi nakin anmah nih kan hmuh deuh tawn. Cu tikah, “Na sual, na palh, na chambo,” tiah a kan ti tawn. A cheu nih cun kan sinah direct in chim loin mi sinah kan chambonak, kan sualnak le kan palhnak an chim tawn. Cu tikah kan thin a hung tawn. Kan kong a kan ceimi nu/pa cu lehrul kan duh tawn. Asinain a zeibantuk mi an si hmanh ah anmah cu lam ttha  a kan piaktu ah an cang theu tawn.

Nihin ah kan theihmi thawngtthabia chungah va cungin pa aa duh lio ah i an tlaimi nu cu a pawngkam ah a ummi phungbia cawnpiaktu saya hna le Farasi hna an um ve. Cu caah a pawngkam ah a ummi phungbia cawnpiaktu saya hna le Farasi hna nih cu nu i a nunnak cu fiangtak in an theih. Phungbia cawnpiaktu saya hna le Farasi mi hna nih mah nu cu Jesuh sinah an run luhpi i zapi hmaiah cun an dirter. Jesuh cu an thawh i, “Saya, hi nu hi pa aa duh lio hrimhrim ah an tlaih. Kan Phung ah Moses nih nawl a kan pekmi cu, cu bantuk minu cu lung in thi lakin cheh hrimhrim awk a si lai, ti a si. Nang, zeitindah na ruah?” an ti.

Misual nu cu phungbia cawnpiaktu saya hna le Farasi hna ruangah Jesuh sinah a phanh kho. Jesuh sinah a phanh ruangah phungbia cawnpiaktu saya hna le Farasi hna sinin sualphawtnak cu a luat lawng si loin Jesuh sin hrimhrim in zong sualphawtnak  a luat ve. “Jesuh nih, “Minu, khuazei ah dah an si dih? Nangmah sual phawtu dingah pakhat hmanh an tang kun lo maw?” tiah a ti. Minu nih cun, “Bawipa, ahohmanh an tang lo,” tiah a leh. Cu tikah Jesuh nih, “Kei zong nih sual kan phaw ve lo. Vakal law a sual bel va sual ti hlah,”tiah a ti. (John 8:10-11)”. Phungbia cawnpiaktu saya hna le Farasi hna ruangah a sual lio an tlaimi nu cu Jesuh sinin nunnak thar tu a hmuh lehlam.

Phungbia cawnpiaktu saya hna le Farasi hna zong an pawngkam ah a hmuhmi misual nu ruangah Jesuh sinah an phanh ve. Jesuh sinah an phanh tikah an sualnak tu an i hmuh lehlam i misual nu cu sual phawt ti loin an zam tak dih. (Jesuh nih, “Nan lak i sualnak a tuah bal lomi nih chep hmasa bik seh,” tiah a hun ti. Cun a kun tthan i vawlei ah ca cu a ttial tthan. Cu bia cu an theih tikah pakhat hnu pakhat in an i zukphiak dih, upa pawl kha an i zuk hmasa. Jesuh lawng cu a tang i a pawngah cun minu kha a dir ko” ( John 8:7-9)).” Va cungin pa aa duh lio ah i an tlai i Jesuh sinah an phanhpimi nu ruangah Jesuh sinin nunnak an lak tthan kho ve.

Va cungin pa aa duh lio ah an tlaimi nu le Phungbia cawnpiaktu saya hna le Farasi hna i nunnak nih misual veve a simi minung pakhat le pakhat nih Kri lei ah kan i hruainak a langhter. Kan sual, kan palh, ka chambo tikah kan pawngkam ah a ummi hna nih, “Na sual, na palh, na chambo,” tiah a kan tinak thawngin kan sualnak cu kan i hmuh i Kri sinah a kan kirpi tawn. Cun kan pawngkam ah a ummi hna an sual an palhnak kan hmuh hna tikah anmah palhnak le an sualnak ruangah kan sualnak a ka hmuhter ve tawn i Kri sinah a kan kirpi thiam thiam tawn.

Bawi Kri ah dawtmi Chin Catholic Tuurun hna, kan pawngkam ah a ummi mi hna sinin Pathian nih a dawtnak in a sinah a kan auhnak auhthawng cu theih kho i Kri dawtnak chungah nunnak thar lak kho peng ding izuam hna u sih.

                                                                                                

Fr. John Mang Peng, Cambodia.