“Zumhnak
he hrinṭhannak in Pathian
fa sinak”
Bawi
Kri ah dawtmi Nu le Pa, U le Nau hna,
Thawngṭhabia rel hmasa hna u sih, “Thiang Thlarau cu a pum in ṭhuro bantukin a cungah cun a rung ṭum. Cun vancung in aw pakhat a rung thang i, “Nangmah cu
kan dawtmi ka fapa na si. Na cungah ka lung a tling,”” (Luke 3: 21-23 ).
Leicung ah chungkhar tampi um a si. Cun chungkhar cio ah Nu le Pa, fa le hna um
a si. Nu le Pa hna nih fa le hna caah Nu le Pa an sinak cu an fa le hna an hrin
caah an nu le an pa an si. Fa le hna an hrin lo / ngei lo ahcun fa le hna caah
nu le pa an si kho lo. Cu ve bangin fale hna zong nih hrintu nu le pa ngei lo
in vawlei ah minung sinak an lak kho lo. Hrintu Nu le Pa hna nih an hrin
ruangah vawlei ah minung sinak cu an hmuh. Hrintu Nu le Pa an ngei ruangah
hrintu Nu le Pa hna i an fa sinak cu an hmuh kho. Cu an fa sinak in Nu le Pa
hna i chungkhar ah member an lut ve kho. Cu caah fa sinak hrampi cu hrinnak in
a ra. Hrinnak hmuhlo in fa sinak hmuh kho a si lo.
Nihin relmi thawngṭhabia chungah kan zoh tikah,“Jesuh nih Pathian fa a sinak le Pathian fa a sinak hrampi cu tipilnak a hmuhnak in a sinak,” kong kan theih. Jesuh nih Johan sinin tipilnak a hmuh lio ah, “Thiang Thlarau cu a pum in ṭhuro bantukin a cungah cun a rung ṭum. Cun vancung in aw pakhat a rung thang i, “Nangmah cu kan dawtmi ka fapa na si. Na cungah ka lung a tling,”” (Luke 3: 21-23) tiah a ti. Khamtu Jesuh nih Pathian fa a sinak cu Johan sinin tipilnak a hmunnak in a fehter.
Kri
ah dawtmi zumhtu hna, kanmah zong Pathian fa kan si ve. Pathian fa kan sinak in
Pathian chungkhar ah member kan si ve. Pathian fa kan sinak cu zumhnak he ti le
thlarau in hrinṭhannak in kan hmuh. Ti le thlarau in hrinṭhannak hmuh lo in Pathian fa kan si kho ve lo. Zumnak he
tipilnak kan hmuh lio ah khan Pathian nih, “Nangmah cu kan dawtmi ka fapa na
si. Na cungah ka lung a tling,( luke 3: 23)” tiah a kan ti ve cang, ka fa tiah
a kan auh ve cang. Pathian nih, “Ka fa tiah,” a kan auhnak cu zumhnak he
tipilnak kan hmuhnak in hrinṭhan kan sinak in a ra ve.
Cu
caah mithiang Paul nih tipilnak hmuhnak thawng in hrinṭhan kan sinak kong he pehtlai in, “Khrih Jesuh he
pehtlaihnak chung i tipil kan in ah khan a thihnak he i pehtlaihnak chungah kan
i hnim ṭi kha nan philh dahra? Cucaah tichung i tipilnak kan vung
in ah khan amah he vui ṭi kan si i a thihnak ah
khan kan thi ve; cu bantuk ṭhiamṭhiam in Khrih cu Pa sunparnak ṭhawnnak nih a thawhter bang khan kannih zong nunnak thar
ah kan nung ve lai,” ( Roman 6:3-4) tiah
a kan ti.”
Dawtmi zumhtu hna, zumhnak he tipilnak thawngin zumhtu vialte hna cu Pathian
chungkhar kan sinak, hi chungkhar ah kanmah zumhtu minung vialte hna cu Pathian
fa kan sinaknak, hi chungkhar ah kanmah zumhtu hna lawng kan si lonak, a
zungzal a nungmi Pathian hrimhrim nih a kan um pinak le Zumhtu chungkhar ah kan
pa bik, hruaitu, uktu, le a kan zohkhenhtu cu kan Pa, Pathian a sinak cu kan
philh tawn, kan inungpi kho tawn hna lo. Cu ruangah Krifa nunzia hna cu kan
kaltak tawn i vawlei nunnak lei ah kan zuang tawn.
Zumhtu
vialte nih Pathian fa kan sinak cu kan thinlung ah a zungzal in inungpi hna
sih. A fa si dingah a kan hrinṭhantu
kan Pa, Pathian cungah lunglawngnak a zungzal in pek hna u sih. A fa kan sinak
caah le kan Pa a sinak caah a zungzal ilawmh u sih. “Nangmah cu kan
dawtmi ka fapa na si. Na cungah ka lung a tling,” (Luke 3:23).
Fr.
John Mang Peng