Zarhleilinak; St. Joseph Cathedral ah phuanmi Thawngthabia
I. Baibal rel awk: Ez. 2:2-5
II. 2Cor 12:7:10
III. Mk. 1:1-6
Kri ah dawtmi u le nau hna, nihin Nizarh 14th nak kan phan than hoi
cang. Kan umnak khua le ram cio te ah kan Cung Pathian nih a kan
zohkhenh i, a minthiang thangtthat cio usih!
Nihin kan bawipa Zisu kri cu Vancung ram thawngttha phuang bu in a
khua a ram ah a phan. Nizarhni ah biak inn ah thawngttha a phuan.
Apumhmi hna tampi nih acawnpiaknak kha an khuaruah a har ko. An ti ve
mi cu, “ Hi vial te hi khua zei ah dah ava hmu hnga? Hi bantuk fimnak
hi zeitin dah a va hmuh hnga. …Mary fapa, lehtama kha a si lo maw?...”
an ti.
Bawi Zisu nih a khua aram le amiphun hna sin ah fimnak he biatak in
cawnpiaknak a tuah ko nate in a khua a rammi hna nih cun, lehtama pa
ti tiang lawng an theih. Amah cu kanmah nak in asang deuh lo, kanmah
bantuk kuli riantuantu a si ve ko, ti khan in an zumh duh lo. Bawi
Zisu I nawl ngeinak kha an cohlan kho lo hlei ah anmah bantuk mi
pakhat a si ti in an rak hmuh. An rak theih ciami Zisu kong nih hin a
thongttha a chimhmi kha an theih piak khawh ti lo.
Kan nunnak, kan pawngkam chung ah, hi bantuk thil hi tampi kan hmuh
theu ve tawn.
A can can ah Khuachung meeting a si lo ah, bupi meeting te hna ah kan
zohchuk deuh mi, nuhmei, ngaktah le misifak tbk.,hna an um tawn I, khi
hna pawl nih a cancan ah biatak kha thinlung tak te in an chim ve
tawn. Asi na in, an inn an lo, an si ning te kha kan zoh hna I, kan
cohlan khawh tawn hna lo. Hihi kan ni ralring awk ngai mi pakhat asi.
Ni hin baibal ca chung ah Judah mi hna hi an sual bak ko. Khamh ding
ah a ra mi an Mesiah bawipa kha an cohlang kho lo. Mari fa, Lehtamah
pa ti le misifah pa ti mi nih an mit a cawtter hna. Kan lai phung
thluk bia nih, “ amui in zoh hlah….” ti mi te kha , hi ka zawn ah
Zisu i, a khua le a ram miphun hna zong nih a mui in an zoh sual cang.
Hi ruang ah hin pek hnga ding mi velbawmhnak tam pi kha an sung. Mizaw
tlawmpal te lawng a dam ter an si ti a si i, Bawipa kha, “….zei ah an
rel lo”(Mk.6:3b)baibal nih a ti.
Hi ruang ah hin ni hin kan Pathian rian tuan tu hna nih, tlamtling lo
bu te in mission ah tuanvo an ngei lio ah hin, culiocan, kan bawipa
Zisu ban tuk in, an minung sining (an inn le lo, thilpuan tbk.,) hna
lawng kha kan zoh i, leng lei sining lawng kha kan zoh ruang ah cun
an sin in zumhtu krifa hna nih kan hmuh hngami Pathian vel bawmhnak
kha kan hmuh kho ti ve lai lo ti zong a fiang.
Nihin bawipa Zisu a khua le ram mi hna nih an rak hmuh ning hin, kan
krifa hna zong nih missionary hna cung ah an hmuhning a si tawn ve.
Kan missionary pawl an sifaknak, an chambaunak le fimnak lei in mi an
nitluk lonak tete hi kan chimh kan theih theu tawn. Kan Pathian rian
tuan tu hna nih Zisu hmun cu vun lak si kaw, a khua aram , amiphun hna
nih Zisu an rak ti bang khan kan ti ngam ngai ve tawn hna. A si na in,
an thluahchuah cu kan cung ah a luang kho ti lo.
Khat te lei in Zisu hmun laktu Pathian rian tuan tu hna zong nih,
mihna a si lo ah pawngkam nih leng lei mit hmuh in an rak suai , an
nisawh,an rak zohchuk ciammam tik ah an celh tawn lo.
Nihin mithiang Paul nunnak le a rianthiang tuan nak ah a tawn ve mi
fahnak, le temh innak ruang ah, a celh ve ti lo I, Bawipa sin ah a hal
mi cu, “…ka lak piak ko” ti hi asi. Bawipa nih a leh mi cu, “ ka
vel hi na ca ah a za ko, zeicahtiah ka thawnnak cu derthawmnak ah hin
a lang,” ti a si. Hnu ah cun mithiang Paul cu, a chambaunak, harnak
phun zakip, temhinnak tam pi lak ah, cohlan, a thiam cang. Pathian nih
a ca ah timhnak le a thil tuahning kha a theih cang. Cu ca ah, hnu ah
cun “,…kaderthawmnak ah si seh, nihsawhnak le harnak le hremnak le
temhinnak ka hmuhmi ah siseh, khrih ruangah kaa lawm ko; zei cahtiah
ka derthawm tikah hin ka thawn a rak si,” a kan ti(2Cor.12:10)
Pathian riantuantu cheukhat hna nih tlam an tling; Inn le lo, phaisa,
thilpuan le ei le din tbk. A si na te in Pathian rian tuantu tam pi
zong nih sifahnak le temhinnak phunzakip an tawn ve. A thuk deuh
ngaimi le a ttha deuh ngai tawn mi thalrau riantuan nak ah Pathian
thil tuah ning a si. Cu cu Vawlei kan pumsa nih a celh tawn lo kha a
si. Lamkaltu ah, Zulhtu James cu thahnak a rak in hmasa tiah kan theih
I(lam.12:2), cu lio te ah Mithiang Peter cu krifa hna thlacam piaknak
thong in a luat ti asi(Lam. 12:7) Pakhat cu luat ter a si i, pakhat cu
thah arak si. An ni khat lo. Hi ruang ah Pathian sual phawt khawh
thiam zong kansi hlei lo.
Zeiruang ah dah Pathian zumhnak le arian tuan nak ah temhminnak a um
hnga? Mithiang Paul nih,….kahmuhmi thil khuaruahhar a tam ruangah
porhlawt ruamkai in ka umsualnak hnga lo kapum ah hin hling pakhat a
ka chiah i, cu hling Satan lamkaltu cu porhlawt in ka um sual nak
hnga lo, a ka dawmhtu ding ah a hman(1Cor. 12:7). Mithiang Paul nih a
porhlaw sual nak hnga lo ding ca ah le toidawr te in a um khawhnak ca
ah Pathian thil tuah ning biathli kha a theih khawh hna. Zumhtu hna ca
ah siseh, Pathian riantuantu hna ca ah siseh tihnung bik mi kan ral
cu porhlawtnak a si. Porhlawtnak cu, Pathian dohnak a si.
Nihin kan rel mi (Ezk.2:2-5) chung ah Profet Ezakiel hi Pathian nih a
thlah tik ah, Pathian a cohlang lo mi, Pathian a dohtawnmi mi phun hna
sin ah kan thlah a ti ve. Kan Bawi pa Zisu, Vancung ram in hi vawlei
ah thlahmi, nihin a miphun hna sin a phanh tik ah “an cohlang lo”.
Leng lei mui zohdawhnak a tel lo mi kan bawipa Zisu cu, cohlan a rak
si lo i, thluachuah velbawmhnak zong tampi a rak tuah piak kho hna lo.
Kan phungchim saya hna tamdeuh cu sifak ngai te in damahsaya rian an
tuan. Krifa hna nih kan zoh hna tik ah nihin Zisu kha a khua a ram le
a mi phun hna nih Mary fapa, lehtamah(misifah) ti an rak zohchuk bang
in, upatnak le cohlannak vial te a tlawm ngai. Cu ca ah, an thluachuah
zong a tlawm kho ve ti hi a si. Khat te lei in, pawngkam nih a hruai
i, tukforhnak ngan pi ah ai cang tawnmi,leng lei zodawh ding men ah a
zuam tawnmi, Kri riantuan zong kan tam theu tawn. Thluachuah kan hmuh
I, zohdawh te te zong kan si tik ah, toidawr te in si ter I zuam hna u
si.
Leng lei zoh dawhnak in cohlan a thiammi minung hna i kan thadernak
kha, ni hin mithiang Paul nih a tei khawh I, kan thadernak le kan
tlamtlin lonak vial in Pathian khuaruahar thawnnak a phuan tawn mi
kha, krifa zumhtu hna kan si ah, Pathian rian tuan tu kan si zong ah
philhhlah u si. “ …..Cucaah cun Krih thawnnak nih a ka huhphenh ti
kha ka hngalh nakhnga, ka derthawmnak ah hin lunglawm tein kaa porhlaw
cang”(2Cor.12:9) AMEN!