“Bawipa dawtnak cu a lak in pek kan si”

Bawi Kri ah dawtmi Krifa nu le pa, u le nau hna,

          Nihin ah Katholik bupi ah relmi thawngtthabia cu John 6:1-15 hi a si. Nihin relmi thawngtthabia chung in theihmi cu Jesuh nih thawngtthabia a phuang lio ah a hnu zulhmi hna nunnak caah pumsa rawl a pek hnanak in a dawtnak a langhternak kong kan theih.

Bawi Jesuh nih thawgtthabia a phuangnak hmun cu Tiberias Rili va ral ah khan a si i mizaw tampi kha a damter hna. ²Jesuh nih mizaw a damter hna tikah hmelchunhnak a tuahmi kha an hmuh caah mi run tampi nih amah cu an zulh. Cun Jesuh nih thawngtthabia a phuangnak hmunhma aa hleng. Tlang pakhat cung ah a kai i cuka ah cun a zultu hna he khan an ṭhu. Mi hna nih an kal lulhmalh hna. Cu tikah a zisuh nih a zultu hna cu a thawh hna i , “Hi mi vialte hna pek awk rawl hi khuazei ah dah kan cawk lai?” tiah a ti hna. A zultu pawl chung in a zultu pahnih nih an lehmi cu, ⁶“Hi mi vialte hna pek awk rawl hi khuazei ah dah kan cawk lai?”⁷ “Tlawmte cio ei ding hmanh ah changreu tangka za hnih leng man a herh lai,” cun ⁹“Hika ah hin barli changreu hlum nga le nga pahnih a ngeimi ngakchiapa pakhat a um, asinain cu tham cu mi hi vialte caah cun zei cang dah a kal hnga,” tiah a ti.

Hi an lehmi an bia hi zoh in zultu pawl an zumhnak kan hmuh kho mi cu, ‘ Zultu pawl nih Bawi Zisuh cu minung pakhat sinak menmen lawng an hmuh kho rih. Zeizong vialte a sertu, a tuahkhotu, Pathian fapa a si,” timi zumhnak lei ah an phanh kho rih lo. Zisuh he hmunkhat ah an rak umtti, Bawi Zisuh phuangmi thawngtthabia zong an rak theih len ko cang, Bawi Zisuh nih a tuahmi hmelchunnak zong an rak hmuh len ko cang. Asinain,“Bawi Zisuh cu zeizong vialte a sertu, a tuah khotu a si,” ti mi zumhnak lei ah an rak phanh kho rih lo.

Nang le kei zong, mi cheukhat caah cun Kri kan sinak kum sautuk a si ve cang ko. Sihmanhsehlaw micheu caah cun nihin kan theihmi Zultu pawl zumhnak ah kan tangrih ko. Kan inn ah, “Zisuh cu Bawi a si,” tiah cafang ngantak in ca kan tar, ni chir le zan chir in thla kan cam ko hna.Sihmanhsehlaw chungkhar ah harnak tawn tikah Bawi Zisuh cu biatak in kan ibochan kho ti lo. Pathian caah rianttuan ding ti tik zongah Bawi Zisuh ibochan loin kanmah minung lawng kan ibochan tawn.

Bawi Zisuh cu a zultu hna zumhnak cu a hmuh tikah lungdong lo tein a ttuan dingmi rian cu a ttuan. Ngakchiapa pakhat nih a ngeimi bari changcheu hlum nga le nga pahnih in mi tampi cu rawl khimlak in a dang hna i hngangamnak a pek hna. “¹¹Jesuh nih cun changreu cu aa lak i Pathian sinah lawmhnak bia a chim i cuka i a ṭhumi cu a phawt hna. Cu bantuk ṭhiamṭhiam in nga zong cu a tuah hna i an dihlak in khim tein an ei. ¹²An khim tikah a zultu kha, “An ei bang kha char dih hna u, pakhat hmanh hlolak hna hlah u sih,” tiah a ti hna. ¹³Cucaah an char dih hna i mi nih an eimi barli changreu hlum nga khan a ṭiltlawt sei hleihnih khat an char,” ( Luke 6:11-13).

Hi Bawi Zisuh dawtnak hi zoh in kan nunnak ah thangzang kan ilaak ve awk a si. Krifa kan si ko nain zultu pawl bangin kan zumhnak cu a der men ko lai. Sihmanhsehlaw Bawi Zisuh nih a kan dawttuk thiam rih ko. A thawngttha a ngaihtu pawl nih Bawi Zisuh cu rawl an  hal lo nain amah lungtheihnak in rawl khimlak in  a dangh hna. Pathian dawtnak cu a lak in a ra. Kan sining cio in a kan dawt. Dawtmi Krifa hna,  Zultu pawl nih Bawipa dawtnak nikhat hnu nikhat an theih chin chin i zumhnak lei ah an thangcho i an nunnak tiang pek khomi zumhnak lei ah an phanh kho bangin Pathian dawtnak ibochan bu in nitin Krifa nunnak thar ah zumhnak lei ah kan thangcho peng ve dingah izuam peng ve hna u sih.

                                                 Fr. John Mang Peng, Cambodia.