Exodus 16: 4,16, 17-20
4 Bawipa nih Moses cu, “Nan dihlak caah van in rawl ka surter lai. Ni fate in nan chuahhnawh lai i cu ni ca i aa za dingin nan char lai. Kan cawnpiakmi hna kha nan zul maw zul lo ti cu hi ning hin kan hneksak khawh hna lai.16 Bawipa nih, nan i zat awk tawk cio in nan char lai, pakhat caah omer pakhat * tluk cio in nan char lai. Cun mahle thlam chung i khua a sami dihlak ca cio khan char a si lai, a ti,” tiah a chimh hna.17A chimhning hna cun Israel mi nih an tuah, a cheu nih tam deuh in an char, a cheu nih tlawm deuh in an char. 18Asinain an tah tikah tam deuh a charmi kha tam tuk an ngei hlei lo i tlawm deuh a charmi kha tlawm tuk an ngei hlei lo. An charmi kha an ca i aa za ciomi a si. *19Moses nih cun, “Ahohmanh nih zinglei tiang nan i chiah lai lo,” a ti hna. 20Asinain a cheu nih cun Moses bia kha an ngai lo i a cheuchum kha a thaizing tiang an i chiah. A thaizing ah cun tholung an khat dih i an rawk dih.
Dawtmi Pathian fale hna, tutan kan homily cu Pathian bia a pakhatnak in la in thlarau thazaang le fimthiamnak i lak hna usih. Hi a cung Pathian bia hi vung rel hna u law, voikhat voihnih vung rel tthan tuah u. Pathian bia cu rel a tam ah a fiang deuh i thlarau thazaang i lak deuh a si. Cu tin nan rel tikah zei fimnak dah nan hmuh i nan ngah. Nanmah nih nan hmuh mi cu i chiah u law, kei nih ka hmuh mi hi vung rel ve tuah u.
Kei ka hmuh i fimnak le thlarau thazaang cu, “Bawipa cu dinnak Pathian a si. A kan dawt tikah dinnak he a kan dawt i ruang te in a kan dawt hlei ah kanmah zong pakhat le pakhat cung dinnak he kan i dawt i ruangte in kan i zohkhenh kha a kan duhpi,” ti kha ka hmuh.
Ziah ti ahcun Isreal mi kha Mana changreu a thlahpiak hna tikah thleidannak a ngei lo, an zapi eikhim einak nawl a pek hna, a hlei in charnak nawl a pe hna lo.
Umhar can ahcun Salawng, T.V ka zoh ton i ka duh bik mi cu, Animal Planet channel hi a si. Ziah ti ahcun tuahchom le phuahchom a si lo mi, titernak le sualnak a ngei lo mi Saram le Thingkung ramkung kong an piah caah a si. Hi kong he pehtlai in ka lung a ka tong bik mi le hrawm hna bikmi cu hihi hin a si. An piah mi cu, Cakei nih Sakhi a seh i a ei saling lio ah Ha e na( Ceinghngia phun) pawl an ra, a bu an si caah Cakei kha an tthawl i a tangmi cu an ei ve. Ha e na pawl an ei dih hlan ah Langta pawl ttor le cheng an hung phan tthan i an cuh
tthan ve. Langta pawl nih an nganh mi cu zute le rungrul te nih an ei i vawlei ah aa cang tthan. Vawlei nih thingkung le ramkung a tthatter tthan i an hnah cu sakhi nih a ei tthan. Cakei nih sakhi a seh lo ahcun hi vialte thil a cang hnga lo.
Cu caah commentator, a kongchimtu pa nih a ti mi cu cakei nih sa a seh mi cu a rian le a pawcawmnak a si hlei ah balancing nature, timi thil sining ruangter a si a ti. Chimduh mi cu cakei le sahngar hna cu sa an seh lo ahcun an thi lai bang in sakhi sazah hna cu thahtu le
sehtu an ngei ve lo ahcun hram le ram an i tin ve lai lo. Commentator nih a ti chih mi cu minung hi saram lak ah a chia bik mi kan si a ti.
Ziah ti ahcun cakei cu a rawl a ttam ca sa a seh i a ttam lo ahcun a seh ve lo. Chim duh mi cu a covo hlei a ei lo i aa nganh lo. Minung cu, a rum mi nih rum chin, ti bang in a rum mi nih kan i zat lawng i lak um lo in a hlei in kan khon kan i chiah tik ah misifak, mi tlamtling lo, hngakttah farah le nuhme pahme cu rawlttam le tihal in an vak. A hlei kan charmi cu Pathian nih a duh lo. Sualnak a si. Cu caah hohmanh a hlei in char hna hlah u sih.
A tang le Pathian Bia hi fimnak caah rel chih u zuam u.Ka Pathian, nangmah nih lung kha na hneksak i dinnak kha na duhmi a si ti kha ka hngalh;1Chanrelnak 29:17 Maw Pathian, siangpahrang nih hin bia ka ceih tikah na dinnak kha ka hman nakhnga, ka cawnpiak ko Salm 72:1 Zeicahtiah Pathian Pennak cu ei le din menmen hi a si lo, Thiang Thlarau pekmi dinnak le daihnak le lawmhnak tu hi a si deuh Rom Cakuat 14:17 Sihmanhsehlaw nang cu Pathian mi na si caah hi thil vialte hi hrial hna. Dinnak le Pathian hmaizahnak le zumhnak le dawtnak le in-khawhnak le lungnemnak kha tuah i zuam hna 1Timote 6:11Sihmanhsehlaw kannih cu Pathian nih a kan kamhmi van thar le vawlei thar, dinnak a umnak inn kha kan hngak 2Peter 3:13
--
Fr.David Khin Hmung
Rector of LWMPT Minor seminary
H.No, 115, Turiya Road.Thazin 4,
Kalaymyo, Sagaing Division,
Myanmar
fdvhmung@gmail.com
phone, 0947073095