THUMKOMH PATHIAN NI

Dawtmi Pathian fale hna,

            can cu a hung liam chin lengmang i Thumkomh Pathian Ni, kan zumhnak a hrampi ni kan hung phan tthan hoi cang. Thumkhomh Pathian kan ti cangka ka lung ah a hung chuak peng mi cu, thumkomh Pathian, Pa, Fapa le Thiang Thlarau Pathian hna i zohchunk awk tlak  an nunnak: Pakhat le pakhat an i dawtnak, tehsa an ngeihnak, an i upatnak, nawl an i ngaihnak le pakhat le pakhat cung  nun an pek peknak hi a si peng.

            Innchungkhar ah siseh, Bu ah siseh khua le ram ah siseh hi thumkomh Pathian nunning cawng in nun u si law zeitluk dah kan chungkhar, kan bu le ka khuaram ahhin a nuam hnga, kan tthancho hnga le daihnak a um hnga ti hi ka ruah kho lo. Hla phuahtu nih, ‘kannih chan cu chanchia rak kan mawhchiat hlah u, a chan tu mawchiat u, a ti bang in kan chan cu chanchia kan ti, nain a chiatertu cu kanmah kan si hi kan philh ton.

            Kan chanchiatnak tlawmte hmuh nak ah ca ttialtu pakhat nih a ttial mi catlang power point in a thlahmi leh piak ta hna lai.

            KAN CHAN KHUARUAH HAR

1. Inn a ngan deuh. . . chungkhar a hme deuh

2. Asin a pi deuh. . . can a tlawm deuh

3. Degree a tam deuh. . . ruahnak a tlawm deuh.

4. Thiamnak a kai. . . piattana a tam

5. Sii a tam chin. . . zawtnak a tam chin ve

6. Rang tuk kan kal . . . fawi tuk  kan thin a hung

7. T.V tamtuk kan zoh, zawnruahnak a zor

8. Chawva kan khawnchin. . . kan man a tlawm chin

9. Tampi bia kan chim. . . tlawm te kan dawt

10. Pawcawm zia kan thiam  . . . nunzia kan thiam ti lo

11. Tampi kan cawk. . . nain nomhnak a zor

12. Nomhnak hmun a karh. . . nomhnak a zor ve

13. Inn ttha deuh kan ngei. . . nain chungkhar tthen lawng he . . . a ti.

            Kan chan hi ka zoh ka zoh tikah hi pa i a chim mi hi a hman tuk ka ti.  Cucu zei ruang dah a si ti  a si ahcun Dawtnak Pathian, komhnak Pathian, zawnruahnak Pathian thumkomh Pathian kan philh caah a si ka ti. Pathian a theimi chungkhar le ram cu duhsah in an kai i Pathian a hlawmi ram le chungkhar cu duhsah te  an ttum ve. Inn le lo vialte ah Vailamtah tung le Mithiang hna hmanthlak he a khat caan Europe cu an tthancho tuk nain kha vialte pakhat hnu pakhat an thlak an lak can a tu Europe cu kai tthan ni a um te hnga maw ti tiang a ttum cang.

            Cun khua le ram a ttum cu chungkhar nunnak le dawtnak a ttum caah a si ti hi kan theih tuk mi a si i Pathian kha chungkhar Lu ah kan chiah lo hnu cu chungkhar zong a ttum ve ti cu kan philh awk a si lo. Cucu duh zong duh lo zong hrial khoh lo mi a si. Thumkomh Pathian pakhat le pakhat an i dawtzia le an pum an i pek zia cu ka uar bak, Hung zoh ve tuah u.

Johan 16: 32-33

Sihmanhsehlaw keimah lawng ngaingai cu ka si lo, zeicahtiah ka Pa nih a ka umpi ko. 33Nannih nih keimah he nan i pehnak thawngin lungdaihnak nan hmuh nakhnga, hihi kan chimh hna. Vawlei nih hin harnak an pek hna lai, sihmanhsehlaw ṭih hlah u. Vawlei cu ka tei cang,” tiah a ti.

Johan 17:4

Vawlei cungah na sunparnak cu ka langhter cang; na ka fialmi rian cu ka lim cang.

Johan 17: 21-23

. Ka Pa, keimah cu nangmah chungah ka um i nangmah cu keimah chungah na um bantuk hin annih zong kan chungah um ve hna seh. 22Nangmah le keimah cu pakhat kan si bantuk hin pakhat an si khawh ve nakhnga, sunparnak na ka pekmi kha ka pek hna. 23Kei an chungah um in nang ka chungah um law, annih cu pakhat taktak an si lai; cun pakhat an sinak thawng cun vawlei nih cun keimah cu nangmah thlahmi ka si le nangmah nih annih cu keimah na ka dawt bantukin na dawt hna kha a hngalh lai.

Johan 16: 12-15

“Tampi chimh awk kan ngei ko rih hna, sihmanhsehlaw atu ah cun nan i cinken khawh cawk ding a si lo. 13Asinain biatak phuangtu Thlarau cu a rat tikah biatak chungah cun an luhpi hna lai. ‘Keimah nawl a si,’ tiin zeihmanh a chim lai lo, a theihmi le a ra lai ding thil kong tu kha an chimh hna lai. 14Keimah nih ka rak in chimhmi hna chung khan an chimhmi hna cu a lakmi a si lai caah keimah kha a ka thangṭhat lai. 15Ka Pa ngeihmi vialte cu keimah ta an si ko, cucaah cun, ‘Thlarau nih cun ka pekmi cu aa lak lai i nannih cu an chimh hna lai,’ tiah ka rak in chimh hna kha a si,” a ti.

            Dawtmi Pathian fale hna hi bantuk pakhat le pakhat dawtnak zawnruahnak le pum i peknak a um ahcun chungkhar ah hnahngawhnak a um kho hnga maw, nuva tthen a um kho hnga maw, bu chung lu i khah lo a um kho hnga maw, cu caah hi A thiangbik mi Thumkomh Pathian nun cu cawng u si law chungkhar dawh le bu ser hna u sih.

--
Fr.David Khin Hmung
Rector of LWMPT Minor seminary
H.No, 115, Turiya Road.Thazin 4,
Kalaymyo, Sagaing Division,
Myanmar
fdvhmung@gmail.com
phone, 0947073095