John 15:1-8“
Mitsur ruang cu keimah hi ka si i a nge cu nanmah hi nan si.
Dawtmi Pathian fale hna, tutan cu ka khual tlawn a tampah caah homily
hmanh thlah manh lo saupi ka um i ka lung a ttha hrim lo. Ka thlah lo
a sau canka Fr. Mang Peng nih a hung ka chimh pah ton i a tu zong hi
ka hung i zuam tthan.
Cun hi Pathian bia hi ka duh tukmi a si i hrawm zong kan duh hrim
hna. Kan Bawipa nih fiang te in, “Mitsur ruang cu keimah hi ka si i a
nge cu nanmah hi nan si” a kan ti. Hi Pathian Bia hi ka hmuh lengmang
ton nain a tu tluk in ka lung a ka tong bal lo i a tu tluk in hrawm
ding ka ngei bal lo. A ruang cu ka hmuhtonmi he aa peh tlai caah a si.
Zeitin a si ti ahcun, kan sianginn te ahhin dum hmete kan ngei i
Biskut le buuti hna ka cin. Zei macan ah thah ka duh tikah ah zei
tluk a kung a tthat i zeitluk a nge a tam hmanh ah a hram in ka tan
hnu cun a suimilam cu chim lo minit pakhat le pahnih kar lak ah a hnah
awihram aa thawk i a thi colh ko. A rang tuk.
Kannih cu biskut, buuti le mai hna a cin mi kan si i an kong kan
theih tuk. Sihmanhsehlaw, kan Bawi Jesuh a tlawnlennak Palestine ram
cu Mitsur in a paw aa cawmmi an si caah Mitsur ruang kong chim ahcun
an theih colh ve lai.Ruang veve an si i an sining an i khat kho. Cu
caah nan mitthlam ahkhan Biskut ruang kha vun cuanter u law, kan
Bawipa bia hi vung ngai pah tuah u, Mitsur ruang cu keimah hi ka si i
a nge cu nanmah hi nan si. Ahohmanh ka chungah a um i kei zong a
chungah ka um ahcun, amah cu thei tampi a tlai khomi cu a si;
zeicahtiah keimah loin(keimah sin in tan incun zeihmanh nan tuah kho
lai lo) nan tuah khawhmi zeihmanh a um lo.
A zei ttenge a si hmanh ah a kung thluagpi in tan hnu cu an thi ti cu
hngal cio a si. A cu belte pakhat a um mi cu thingkung ram kung cu
hmuhthiam toghtham thiam mi a si tik ah theih a fawi te. Sihmanhsehlaw
Pathian le minung thingkung le a nge bang kan i peh tlainak cu vawlei
mit in hmuh khohmi a si lo tik ah zumh le pom a har ngai. Cu caah
vawlei ah mi tlawmte lawng nih Pathian kha biatak in an zumh an pom hi
khuaruah har awk a um lo. Cu caah kan Bawipa nih Vancung kalnak lam cu
a bi te kutka bi in lut u a kan ti mi hi a si ve lai.
Cu caah hi nih a kan fianter rih mi cu vancung hi hawi Budang Pastor
pawl nih an chimbang in fawi le bai in cun lut a si lai lo ti cu a
fiang. Cu tikah Jesuh he kan i peh tlainak hri le zuun cu zeidah a si
ti biahalnak a hung chuah cang. Hi ahbin kan Nu Bupi nih cun
Sacramentu pasarih hi an si a ti Hihi Bupi lu a si mi kan Bawipa
Jesuh he kan i tlaihnak ruangpi le kung pi cu a si. Nunnak ti le
vaitamin cu sacramentu in an hung luang.
Baptism cohlangnak thawng in Jesuh ruangpi ah kan keuh i kan i peh,
Thalarau thazaang hmuhnak thawng in cu thapek le tuamhlawm kan si.
Thiang Thlarau nih ral phunzakip in khamh in a kan kilven. Cun Bawipa
Thi le sa einak thawng in thlarua rawl cu kan ei kan din i kan tthang.
Tlangbawi cannak le Nupi tthihnak thawng in amah i patling nutling
sinak ah kan i hrawm. Sualthlahnak thawng in amah dawtnak le
ngaihthiamnak kan i hrawm i mizaw sathau thuhnak thawng amah i damnak
ah kan i hrawm. Cu caah sacramentu a tlingte a ngahmi poh cu Khrihfa
nunnak ah pitling kan si.
Sihmanhsehlaw, Khrihfa hna tampi cu hi tluk ttha sacramentu hi a
rianttuannak le a tthatnak an theih lo tikah cohlang ding an i zuam lo
i a cheu chinchap cu cohlang awk tiang an ttih. Sacramentu timi cu:
1. Sacramentu cohlang cu Pathian Bia cohlang a si ti hi kan thei ton
lo. Sacramentu vialte hi Pathian Bia zulh in tuahmi an si dih.
2. Bupi nih Pathian Bia a kan cawnpiaknak a si ti hi an thei lo. Cu
caah sacramentu cohlang hlan poh Pathian bia rel le cawnta hi a si
peng.
3. Sacramentu cu Bupi nih a fale bomhnak awk le bomhnak ca a kan
tuahpiak mi a si ti kan philh ton. Abiana ah fate ngaih tikah nulepa
le cingla rualchan vialte te an i lawm. An zoh an pom, laksawng an
put i thluachuah an hal piak hna. Cu bangin kan Nu Bupi zong aa nuam
i Tipil peknak le thlacampiaknak thawng in lawmhnak he a cohlang i nu
le pa lawmhnak kha a hrawm ve.
4. Sacramentu cu Khrihfa hna ttuanvo si lo in covo a si ti hi kan
philh ton. A cancan ah Siangboi a cheu nih Sacramentu in Khrihfa hna
kha an tlaihkhih hna, a tlerh hna, cu bang in Khrihfa cheukhat zong
nih sacramentu hi Siangboi hna rian le phunglam tlinter khan kan hmuh
ton. A taktak ti ahcun sacramentu cu Bupi nih kanmah bomhawk ca a kan
tuah piak mi a si i, cohlang ding cu kan covo a si i pek ding cu
tlangboi hna an rian a si.
5. Sacramentu cu Bawi Jesuh hi pumkhat a kan can tertu a si ti hi kan
philh ton. Bupi tuanbia kan zoh tikah sacramentu hmante a cohlang i a
pom cangmi cu tlak a um ti lo ti hi kan hmuh. A piangtthar, a
hrinttharmi le holhtheihlo holh le mi tiang a dam ter mi hi voi tampi
cu an tlak tthan ti hi kan hmuh.
Cu caah dawtmi Khrihfa hna Pathian Bia conak ah Sacramentu hi hmante
le tlingte in cohlang i zuam u sihlaw, cutincu kan Ruangpi Jesuh ah a
pehmi kan si lai, a nunmi kan si lai, i theitampi a tlaimi kan si lai,
Pathian kha sunparnak a pe mi kan si lai i, kan halmi poh a comi kan
si lai. I zuam hna u sih.
--
Fr.David Khin Hmung
Rector of LWMPT Minor seminary
H.No, 115, Turiya Road.Thazin 4,
Kalaymyo, Sagaing Division,
Myanmar
fdvhmung@gmail.com
phone, 0947073095