Nancungah diahnak um ko seh
"Cu hnu zarh khat ah khin a zultu hna cu inn chungah
khan an um than i Thomas zong kha a um ve. Innka cu an hrenh dih hna,
sihmanhsehlaw Jesuh cu a rung lut i an lakah khan a dir, “Nan
cungah ah daihnak um ko seh,” tiah a ti. Cun Thomas cu a thawh i, “Hika ah hin
ra law ka kut hi zoh tuah hna; cun ka hnak kha ka tawng tuah. Zum loin um ti
hlah, zum cang ko,” tiah a ti. Thomas nih cun, “Ka Bawipa le ka Pathian,” tiah
a ti. Jesuh nih cun, “Na ka hmuh caah na ka zumh. Sihmanhsehlaw keimah hmu loin
a ka zummi hna caah cun lunglawmh awk a va si dah,” tiah a ti (Johan
20:26-29).
Nihin kan i hrawm dingmi
a biatlang cu “Nan cungah daihnak um ko seh,”
timi a si. A tlangpi pathum in then ka duh.
Pakhatnak ah, Jesuh cu thihnak in thawhter a si tikah a
zultu hna cu a va ton hna i, “Nan sin cungah
daihnak um ko seh,” tiah a va ti hna. An thin a rak phan tuk i an rak tih tuk
lio ah an Bawipa he an i ton i cu ti cun a chawnhbiak hna tikah zeitluk in dah
a zultu hna an i lawm lai i an hna a rak ngam lai timi hngalh khawh a si. Jesuh
Khrih he an i ton tikah annih cu Pa Pathian Thlarau thawnnak in an khat i
raltha ngai in an thi tiang thawngtha bia an rak phuan. A zultu hna nih Jesuh
dawtnak cu a taktak in an rak tep. Vailam cungah zeitluk in dah Pathian nih a kan dawt timi kha a tho
than hnu in an rak fiang. Mah nunnak tiang peksian in dawtnak a ngeitu Jesuh a
si kha an fiang. Cucaah hnangamnak in an rak khat. Kannih zong a ngan bikmi
dawtnak a ngeitu Jesuh nih daihnak a rak kan
phawrh ve. A zultu hna sinah “Nan cungah daihnak um ko seh" a ti hna bang
khan a kan ti
ve.
Kanmah zongThawhthanpuai kan
tuah tikah kan i lawm tuk hringhran,
zeiruangah ti ahcun Jesuh nih a zultu hna sinah a rak pekmi Thlarau kha a kan chiah tak ve caah a
si. A zultu hna nih an nunnak a dih tiang a thawngtha an rak phuan bangin
kannih zong kan
phuan ve awk a si. Kannih cu Jesuh Khrih zultu kan
sinak le Khrihfa kan sinak cu Pathian kan biak le kan lungput
nuncan ziaza le thil tinak in kan
langhter. Cucaah Khrihfa kan sinak cu mi
vialte sinah kan nuncan ziaza in le kan nunnak in nifatin kan langhter peng awk a si.
Pahnihnak ah, Thomas nunning hi kan i cawn awk a si. Amah cu Khrih a tho
than taktak hnga maw? tiah lunghringnak a rak ko nain tha tein hngalh a rak
zuam i zuam than. A hngal tikah a zum than kho. Thomas nih lunghringnak a
rak ngeimi cu lunghringnak sawhsawh a si lo. Tha tein hmuh fiang duhnak tu a
rak si deuh. Kanmah zong kan hngalh taktak
lomi ah lunghringnak kan
ngei ve awk a si ko. Asinain Thomas cu a Jesuh Khrih he an i ton taktak tikah
Khrih thawhthannak cu a rak zumh khawh than. Cucaah kanmah zong Thomas bantukin
a si taktak maw si taktak lo tiah hlathlainak kan
ngei lai i kan fiang taktak tikah kan zumh khawh ve a hau.
Jesuh nih cun, “Keimah hmu loin a ka zummi hna caah cun lunglawmh awk a va si
dah,” a ti. Mit hmuhnak longin a zumhmi nakin mit hmuh loin a zumhmi hna caah
lunglawmhnak a tam deuh tinak a si. Jesuh a tho thannak cu kan
mit in kan hmuh caah kan
zumhmi si loin a bia in kan sinah khua a sa
caah kan
zumhnak a si. Cucu Baibal ca nih fiang tein a kan cawnpiak. A tho thanmi Jesuh cu Thlarau
in kan sinah khua a kan sakpi ko ti hi hmuh fiang hna u
sih.
A donghnak ah, Thomas aa tangdawrnak le milihchimlo
(honesty) a sinak hi kan
i cawn awk a si. Thomas nih ka zumh lai lo a rak ti nain Jesuh a si kha a theih
le cang kaa in “Bawipa ka Pathian,” tiah a ti colh. Cu tin a ti khomi cu aa
tangdawr tuk caah a si. Cun lihchim lo tein a hgalhmi kha a hngalhning tein a
cohlan khomi a si caah a si. Thomas cu sorry (ka palh) ti dingah tim cia tein a
um. Kanmah zong kan santlai lonak le tlamtling
lonak hna hi kan
cohlan kho a hau. Cu ti in mi sual ka si tiah kan
i ti kho longlong ah Pathian he remhnak kan
hmu lai i kan unau hna he zong kan i rem kho lai.
Thomas bantukin lihchim lo tein kan sining
tein nun khawh kan
i zuam hna lai.