" A hmunmi le aa thleng lomi Pathian dawtnak cu 100% zumh cang
tuah"
Kan kawlrampi caah a biapi bikmi puai cu January 4 ah tuah tawnmi Independent day puai a si i
kawlram pi ah budhist pawl caah a biapi ngaingai mi an biaknak puai cu Thingyan
Festival asiloah Water Festival a si. Cu ve bangin kanmah Krifa hna caah kan
biaknak puai pi pahnih kan ngei ve hna. Cu hna cu Christmas puai le Easter
(Thawhthan puai) an si. Hi hna pahnih chungah a biapi deuhmi le a sungluai
deuhmi
puai cu Easter (Thawhthan puai) a si.
Cu thawhtthan puai cu sungluai ngai le hmual
ngei ngai in tuah kho dingah timhtuahnak le iremhnak caah ulhcaan “Lent” kan
ngei. Cu Lent caan cu ni 40 a si. Tu kum ah cu lent caan aa thawhnak cu kan hnu
thla February 18, 2015 in a si. Atu cu Lent caan zarhthumnak chungah zarhpi ni
ah kan rak phanh cang. Hi Lent caan chungah kanmah nih thinlung in timhtuahnak
le iremhnak ngei dingah bupi nih Pathian bia in siseh, a dangdang cawnpiaknak
in siseh thazaang a kan pek peng.
Bupi nih nitin kan relmi thawngtthabia in
thazaang a kan pek pneg. Cu hna chung in hrawm kan duhmi thawngtthabia cu nizan
zarte ni ah kan rel mi Luke 15:1-3, 11-32 chung asi i Fapa tlau pa kong le a Pa
dawtnak kong a si. Siangbawi pakhat nih amah gtalk ah a motto pakhat a tar.
Cucu,“Dawtnak cu a zeizong vialte nakin a thawng bik,” tiah a tar. Cu siangbawi
pakhat I a motto bangin Pathian dawtnak cu a zeizong vialte nakin a thawng bik
taktak. Jesuh nih Pathian dawtnak cu fapa pahnih a ngeimi Pa i dawtnak in a
langhter.
Nunnak tak cu Pathian sin lawng ah a um:
Fapa tlau pa nih a pa sinah a rak um lio ah a
pa dawtnak vialte a rak co dih. A pa nih a ngeimi rosung vialte cu amah ta a
rak si ve dih. A nunnak ah zeihmanh harnak a rak ton lo. Ei le din, hruhaih, le umnak inn le lo
kong ah hnangamnak a rak ngei. An sinah a ummi sal hna hmanh cu khim tein an
rak ei din ve dih. A pa duh pi ning tein nunzia din le tha tein a rak nung.
Sualnak a rak tuah lo. Nunnak tak cu a rak hmuh. Nuamnak tling a rak hmuh. Hnangamnak
tling a rak hmuh.
Pathian sinin a kan tthentu a hrampi Sualnak:
Fapa tlau nih a dawttu a pa sinin a co hnga mi a pa rosung vialte a hal dih I a
pa sinin a duhnak hmun ah a kal hnu cun a pa duhpimi nunzia tha cu a kal tak i
amah pumpak duhnak in a nung cang. A pa sinin a hmuhmi rosung vialte cu amah
duhduh in amah pumpak nuamnak caah a hmang dih. A kalnak ram ah mangṭam a tlung ciammam i a tawro in a ṭhu. Cuka ram mipa pakhat sinah khan kuli va ṭuan awkah a kal. Cu pa nih cun vok cawngh awkah
a lo ah a rak kalter. Vok nih an eimi bekawng hmanh kha ṭam lenning ti a duh, asinain ahohmanh nih ei
awk zeihmanh an pe lo. Ei awk le din awk hmanh a ngei ti lo. A pa rosung vialte
dih in leicung nuamnak cu sual tuahnak in a kawl len ko. Asinain amah duhnak in
leicung nuamnak caah a tuahmi sualnak cu amah
caah harnak hrampi aa cang lehlam.
Sualnak chungin Pathian dawtnak hmuhnak:
Fapa tlau cu a pa sinin a hmuh mi a pa rosung
vialte cu leicung nuamnak caah amah duhduh in a hmang dih hnu cun ei awk hmanh
ngei lo tiang in harnak a ton. Cu harnak a ton ruangah a lung a rak fim i a pa
sinah a rak um lio ah a rak nunnak kong a ruah tthan. A pa nih a cungah a rak
dawtnak a pa dawtnak vialte a ruah tthan, “Ka Pa kuli vialte hmanh nih ei cawk
loin ei awk an ngei, kei vial hika ah hin rawlṭam in ka thi cuahmah.”tiah a ti
cang. Kanmah pumsa nuamnak caah sualnak tuahnak in thlarau nun ah harnak kan
tonnak nih Pathian sinah lam a hruai tthan lehlam i a kan dawttu Pathian tu a
kan hmuh ter tthan tawn. Pathian nih a ka dawtnak a kan hmuhsaknak chungin
Pathian sinah ruahchannak kan ngei.
Zumhnak tak thawngin sualnak ingaihchihnak in nunnak thar:
Fapa tlau pa nih a pa nih a cung ah a dawtnak a
zumhnak thawngin a pa sinah kir tthan dingah biakhiahnak aa ngei kho I a
biakhiah ning bangin vok cawnghnak nunnak hlun cu a kal tak I a pa sinah a kir
than: “Ka tho lai i ka pa sinah ka kal lai i, “Ka pa, Pathian sin le na sinah
ka sual cang. Na fa ti awk ka tlak ti lo; na kuli pakhat bantukin ka chia ve
ko,” ka ti lai,’ a ti. Cucaah a tho i a pa sinlei kir ah cun aa thawh (Luke 15:
18 -20). Cu ve bangin a kan dawtu Pathian I a dawtnak cu kan zumh lawngah kan
sualnak vialte kha kaltak in Pathian sinah kan kir kho ve I Pathian sinin
nunnak thar kan hmuh than kho ve.
Aa hmunmi Pathian dawtnak:
A pa nih a tlau mi a fapa cungah a dawtnak a thleng bal lo. A fapa cungah aa hmunmi
dawtnak a ngei peng. Cu caah a pa nih a fapa, “Lamhlatpi i a rat lio kha a pa
nih cun a rak hmuh; a zaang a fak ngaingai i a hei tlikhnawh i a kuh i a hnamh
(Luke 15: 21).” A pa nih a fapa cu a hmuh tik ah a fapa nunzia that lonak cu a
ruah ti lo. “A fapa nih zeibantuk sualnak a tuah,” tiah biahalnak a ngei ti lo.
A fapa sinah a va tli I lunglawhnak khat he a va cohlan.
Nihin Thai ramri Koh Kong myo ah ka um lio
pi a si i tuchun kan rawlei
biaruahnak ah kan Damahsaya nih siizung ah mizaw bawmhnak kongkau he pehtlai in
Krifa hna sinah a hlu a hal tik ah a tonmi thil pakhat kong a ka chim. Amah nih
a ka chimmi cu, “Siizung ah a ummi mizaw pakhat caah krifa hna sinin a hlu ka
hal hna a ti. Krifa cheukhat nihcun mizaw caah bawmhnak an ka pek. Asinain
Krifa cheukhat hna nih cun mizaw bawmhnak caah a hlu a kan pek lo hlei ah mizaw nunzia that lonak kong an ceih
chih,” tiah a ti.
Pathian nih a kan dawt tik ah kan nunzia a tha
le tha lo ruangah a kan dawt sihin lo in aa thleng lomi a dawtnak chungah aa hmunmi a dawtnak in a kan ser
ruang tu a si. Pathian dawtnak cu kanmah sining nih a thleng kho lo. Kan
sualnak nih Pathian dawtnak cu a zorter lo bangin a ngan ter deuh hlei ve lo.
Kan dinnak zong nih Pathian dawtnak cu a ngan ter deuh lo bangin a zorter deuh
ve hlei lo. Cu bantuk Pathian dawtnak cu kanmah mi vialte, misual le midin caah
a si dih. Pathian nih mi vialte cu aa hmunmi le aa thleng lomi a dawtnak in a
kan dawt zungzal.
Pathian sinah misual kan sinak iphuannak:
Fapa
tlau nih harnak a ton hnu cun a lung a fim I a nunnak cu fiang tein aa hmuh I a
pa dawtnak cu fiang tein a hmuh ve. A pa dawtnak cu a zumh i a pa sinah kir
dingah bia aa khiah bangin a pa sinah a va kir taktak. A pa cu a va ton tik ah
a pa a ton hlan ah a thinlung chungah a rak I ruah cia mi bangin a pa sinah a
sualnak cu aa phuang tak tak. Amah nih cun, ‘Ka pa, Pathian sin le nangmah
sinah ka sual cang. Na fapa ti awk ka tlak ti lo,( Luke 15: 21)’ tiah a ti.
Biaktak tein a nunnak a hmuhmi pa nih misual a sinak aa hngalh. Cu sualnak cu amah tein aa
thiangter kho lo caah a sualnak thiangter khotu Pa Pathian a kawl. A sualnak
vialte pakhat hmanh hrilh le pheh lo tein Tlangbawi sinin Pathian sinah a phuan
dih.
Ka umnak ram ah Krifa cheukhat cu sual an rak i
thlah tik ah keimah nih ka theihmi holh hmang duh lo in keimah ka theih lomi
holh hmangin sualthlahnak an tuah. Lent caan cu biatak deuh in kan thinlung
ithleng caan a si bangin Pathian
sinah tlangbawi sinin sualthlahnak kan tuah tik ah thinlung tak tein kan
sualnak vialte kan phuan dih ding a si.
Pathian nih sual aa ngaihchihmi pa cu lunglawmhnak khat he a fa
sinak ah a cohlan:
Fapa
tlau pa a pa nih a fapa cu aa thleng lomi aa hmunmi a dawtnak chungah a fapa
sinak in a cohlan tthan. A fapa sinak cohlannak hmelchunnak caah a pa nih khan
a sinum kha a auh hna i, ‘Khulrang in puan ṭha bik kha rak pu u law aih u. A kutdong ah kutdonghrolh hrolh u
law a ke ah kedan danh u.Cun va kal u law
cawfa a thau bik kha va la u law va that u, lunglawm ngaiin puai tuah u sih.
Zeicahtiah hi ka fapa hi a rak thi, sihmanhsehlaw atu cu a nung ṭhan; a rak tlau, sihmanhsehlaw atu cu ka hmuh ṭhan cang, ( luke 15; 22- 28)’ a ti hna i cun
cuticun a fapa cohlannak puai cu a tuah. Cucu a kan dawtu Pathian sinah kan
sualnak vialte ingaichih in kan kir tik ah Pathian nih kan caah a lunglawmhnak
he a kan cohlan venak hmelchunnak pakhat a si.
Dawtmi zumhtu hna, Pathian fa kan sinak cu 100%
fehter chin dingah Ulhcaan chungah nunnak tak cu Pathian sin lawng ah a um timi biatak kan itlaih
kho kan herh. Pathian sinin a kan tthentu a hrampi cu Sualnak a si timi alh awk
tha lo biatak zong cu thinlung in kan I tlaih a herh. Cun sualnak chungah kan I
ciah sual len hmanh ah lungdongh ding si loin kan sualnak chungin Pathian
dawtnak cu kan hmuh kho a herh ngaingai. Cu bantuk Pathian dawtnak cu kan hmuh
lawng si loin a dawtnak cu kan zumh kho a herh. Cu a dawtnak kan zumhnak nih
kan sualnak ingaichihnak, lungthlennak lei ah a kan hruai i Pathian sinah a kan
kir pi. Pathian nih a hmunmi a dawtnak in a
kan dawt caah Pathian sinah misual kan sinak iphuannak cu raltha ngai in kan
tuah ngam a herh. Cu ti thinlung takin
Pathian sinah tlangbawi hna sinin kan sualnak vialte kan iphuan hnu cun Pathian nih lunglawmhnak khat he a fa sinak ah
100% a kan cohlan than cang.
Pathian nih aa thleng lo mi le aa hmunmi a dawtnak
in a kan dawtnak cu 100% zumh cang ve tuah.
Fr. John Mang Peng,
Koh Kong,
Cambodia.
Mobile:+85593791977