Voikhatnak-Baibal-relnak-
Voihnihnak-Baibal-Heb-9:24-28
Thawngthabia-Mk12:38-44
“Hi a si a fakmi nuhmeinu nih hin tangka kuang ah midang vialte nakin tam bik a sanh. 44Zeicahtiah a dang nih cun an ngeih hlei kha an sanh,sihmanhsehlaw hi nu hi cu sifak ngai a si ko nain a ngeihmi vialte kha a sanh dih a nunnak ca i a hman dingmi kha a thawh dih,” tiah a ti. Mk 12:43-44
Tuni Baibal nih a kan cawn piak mi cu pekchannak kan tuah tikah lungthin chung in a hman mi dawtnak he pekchan ding in a kan theih ter. Pathian sinah le kan unau, inn pa hna sinah dawtnak he kan pek tikah lungchung luatnak(inner freedom) le nunnuamnak kan ngeih. Bawi Zisuh nih a zultu hna kha nan pek tikah dawtnak he pek u tiah a cawnpiak hna; zeiruang ah kan ti ahcun dawtnak nih zeitik hmanh man a hal bal lo hleiah siangnak lungthin(generosity) a ngei. Bawi Zisuh nih nuhmei nu i a tlawm ngai mi a hlu le mirum hna i a tam tuk mi tangka kha a tahchunnak cu hi pekduhnak lungthin a langhter duhnak kha a si. Peknak ti mi cu kan lungthin chung in ra ding a si i, laksawng ti mi cu dawtnak kan langhter duh ruang ah pekmi a si. Laksawng timi cu dawtnak, pum ipeknak le siangnak lungthin (generousity) he pek mi a si i, a man khiat kho lo mi a si. Kan pek tikah thil cawk man, cun a ngan le a hme (size) nih a biapi a si lo. Kan pek mi thil te cu a tlawm zong a tlawm men lai i, a hme zong a hme men lai, a si natein a biapi bik mi cu zei bantuk lungthin he ka pek timi hi a si thiam thiam. Zeicatiah Pathian nih kan lungchung dih lak kha a hmuh khawh i a thei dih. Cu caah zei bantuk lungthin he dah na pek lai, dawtnak lungthin he maw, a silo ah mi nih ka thangthat hna seh timi lungthin he maw?
Tu ni kan rel mi Gospel hi reflection kan tuah tikah kan hmuh khoh rih micu Bawi Zisuh nih nuhmei nu zeizat a pek timi a theihnak thongin Pathian cu kan kalnak, kan tuahnak vial te cungah a kan hmuh dih timi hi a fiang ter. Nuhmei nu nih "dar tangka pahnih" a pek timi a sining te in a langh ter mi hi kan zoh tthan ahcun tawidornak le a sining tein (simplicity) amah le amah a cohlangnak zong hi kan hmuh khoh. Kanmah vial te zong kan sining tein kan ni cohlang thiam a herh i, kan pek tikah dawtnak le siangnak lungthin he kan pek a herh ngai ti hi, hi nu hmei nu sinin cawn ve ding a si.
A can can a hlu peknak he pettlai in kan hmuh theih ton mi cu, a bianabia in, unau cheukhat hna nih a hlu pek an ni tim tikah Siangboi le Sister hna an va si ahcun, Siang boi pawl hi an pek deuh ton, zeiruang ah ti ahcun, an ni cu Missa raithawinak an tuah khoh cu ta, cun Sister le Damasaya an va si ahcun Sister pawl hi an pek deuh ton, zeiruang ah kan ti ahcun an nih cu Bawi Zisuh thisaa an ni biak (Adoration) tikah, thla an kan cam piak lai cu, ti a si. A can can cu, lam pawng ah a hal len mi sifah hna kan pek kho lo natein mirum kan hoikawm hna cu a man fak ngai mi laksawng kan cawk piak kho ton (Pekchan nak lungthin hi chim ka duh ruang ah a si i, nan ka theih thiam lai tiah zumhnak ka ngeih). Sualphawt duhnak he ka chim mi silo in, keimah pumpak in thawh i, minung kan lungthin nih haa kaunak tlawmpal cio cu, an ngei theo ton i, thangthatnak cu an kawl pah ton.
Hi ti hin ka chim tikah Siangboi te le Sister te cu a hlu pek a herh lo ti duhnak si lo. Kan pek chin chin ding a si. Zeicatiah annih cu an pumpak caah rian an ni ttuan kho lo an pum an ipek bu in, rian tampi bupi caah an ttuan ve. Chim duhnak cu ni fatin kan eidinnak le kan hman khawhnak hna cu Pathian thluachuak ruangah a si timi theihthiamnak le zumhnak hrim hrim ka ngeih a herh ngai. A hlu kan pek tikah ngah duhnak lungthin he kan pek ahcun, hihi lungthin tak in peknak a si ti lo. Pakhat khat ka ngah tthan lai timi lungthin he kan hngak zungzal sual lai. A hlu pek mi cu Pathian sin in kan ngah mi chung in pek tthan mi kha a si. Krifa pakhat nih keimah ka thiam ruangah, keimah ka ngei ruangah tiah "keimah, keimah" hi tampi kan hmang sual ahcun a thluachuak tampi hna kha kan philh sual lai. Zeiruang ah ti ahcun Bawi Zisuh nih a thisen in a kan tlanh timi zumhnak he krifa sinak cu kan rak zulh i, krifa kan ni ti tikah, zeitin hen keimah ruangah, keimah thong in kan tikhawh lai. A si keimah nih ka tuah khawh natein mah ka tuah khonak hi Pathian sin in a ra mi thazaang le thluachuah timi, zumhnak kan ngeih ahcun zeiruang ah a hlu pek ding a har lai. Nuhmei nu hmanh nih a ngeih chun mi vialte a pek dih ahcun nang le kei, thil tampi a tuah khoh mi hna nih kan pek kho lai lo cu. Amah nih a kan pek mi pek tthan cu kan siang kho lai lo maw?
Cun, pekchannak ti tikah a phunphun a um rih. Kan nunnak ah Pathian nih ttuanvo a kan pek mi cungah fel tein (faithfully) nunnak hi a si. Pathian rianttuantu nih a biakamnak bantuk in fel ding a si, cun innchung khar ah Nu le Pa nih innchung khar nun nuamnak sernak ah fel ding a si, kanmah vial te kan ttuan mi cung cio ah fel tein ttuan ding hna kan si dih. Ni fatin kan nunnak ah Pathian nih a kan duh hnawh chan bantuk in kan nun ahcun khakha tlamtling mi pekchannak a si ko. Cu long ah a din le a hman mi krifa kan si lai i, kan pekchan mi kan nunnak cio ah a sullam ngeih mi nunnak he Pathian rian cu kan sining tein kan ttuan kho ve lai. Keimah le keimah fel tein ka nunnak cu Pathian nih a ka ser hnawh channak kha tlamtling termi a si i, cu zong cu pekchannak pakhat a si ve. A si ahcun tu ni Baibal ca pathum nih a kan chim micu lungtak tein pekchan ding le temhinnak tiang tuar in pekchan hi a kan duh; zeicatiah kan tuah khawh nak vial te cu Pathian sinah kan ngah mi thluachuah an si dih i, kan herh mi vialte cungah Pathian nih a tlamtling ter dih lai caah a si.
Sr. Monica Zungmen
(Franciscan Missionaries of Mary)