"Keimah cu vancung in a rami nunnak Changreu ka si i, hi Chang reu a ei mi vialte nih nunnak an hmuh lai". (Johan 6: 35)
Tuni kan theihmi le kan rel mi Bible cu, Missa raithawinak cu Boi Jesuh amah le a pum a peknak hmelchunhnak a langhter mi Baibal a si. Hi Baibal catlang hi fiang ter deuh dingah (Mathai 26:26-28) chungah ah kan rel ahcun "Cun, an ei lio ahkhan, Boi Jesuh nih Changreu kha a lak i, thluachuak a pek hnuah, a zultu hna sin a pek i, a chim micu,"mah hi ka pum a si, i lak ulaw ei tuah uh," Cun hrai kha a lak i, lomhnak bia a chim hnuah a pek than hna i, a chim micu, nan zatein mah hi din tuah uh, mah hi cu nan mah le keimah pekchan nak kha Pathian nih a cohlang nak hnga caah thlermi ka thi a si”tiah a ti. (Hihi cu, Missa raithawinak kan ngei paoh ah Siangboi tenih an tuahmi thlacamnak a si.)
U le nau hna, Boi Jesuh thi le sa (Eucharist) cu kanmah Roman Catholic Bupi chungah a lai fangbik a si mi, "lungthin " (the heart of the Church) a si. Hihi cu, missa raithawinak a si i, Boi Jesuh a thih hlan a zultu pawl he a hnu bik zanriah an ei lioah a rak sermi Sacrament a si. Hi bantuk in misaa raithawinak a rak ser mi cu, amah le amah pum a peknak kha langh ternak hmelchunh a si. Zeiruang ah ti ahcun, Kalvary tlangpar ah thih a ingnak cu, kanmah vial te hna sualnak chungin tlanh dingah a rak si bantuk in, Missa raithawinak ah a pum le a sa kan ei nak cu kan thlarau caah nunnak rawl a si. Ti duhnak cu mahtluk hin a kan dawt tinak kha a si. Vailamtah cungah thihnak a ing hleiah Chanreu tangah toidawrnak he kanmah caah a sining in a rak kan um pi.
Thi le sa ti cu nunnak (life) kha a si. Boi Zisuh Kalvary tlang par ah a thihnak cu nunnak pek dingah a nunnak a rak pekchannak kha a si. Cu bantuk in missa raithawinak ah amah le a pum cu a rak pek. Cun, Missa raithwinak ti cu Boi Zisuh nih amah sinah pumkhat siding ah a kan kawhnak zong a si. Pa Pathian le amah pumkhat an si bantuk in amah le kannih zong pumkhat sinak kha a duh ve.
Cu caah missa raithawinak in kan hmuh khoh micu, Catholic ti cu, Universal = Volei cung kakip he a pehtlaimi tinak kha a langh ter. Siang boi vialte nih kakip ah, hi missa raithawinak cu an krifa vialte hna caah an tuah i, hi missa raithawinak ti cu, Bupi ah pumkhat sinak hmelchunhnak (symbol) a si. Kanmah Roman Catholic Bupi chungah cun, nikhat ah kan rel mi Bible hna cu aa lawh dih, Missa thlacamnak zong a lawh dih i, Liturgy pakhat long hi Vawlei cung kakip ah kan hmang. Hi hna nih hin a sinah pumkhat kan sinak cu a langhter. Siangboi pawl nih missa an tuah tikah anmah caah le an sin ah a pum vemi krifa hna caah lawng si loin vawlei cung ah a ummi Bupi a simi nang le kei, kanmah vialte caah raithawinak an tuah. Cu hlei in, a kan kal tak cang mi kan u le nau hna zong kha hi raithawinak ah thla an campiak, mah hna nih hin pumkhat kan sinak cu a langhter. Amah le amah pumpeknak he pumkhat a kan si ter.
A kan kaltak cangmi Pope John paul II nih a chuakmi (On the Eucharist in it's relationships to the Church) chungah a ttial mi cu, “Missa raithawinak kan tuahnak a biapibik cu, Bawi Zisuh cu a tak tak in Changreu ah a um timi zumhnak kha fekter dingah a si i, mah hi cu kanmah krifa hna caah a ngan bikmi ruahchannak a si" a ti.
Cu caah Bawi Zisuh thi le sa cu kanmah caah thlarau rawl a si i, a kan dawtnak chungin a nganbik mi dawtnak a si. Hi dawtnak hlei in kan hmuh khoh mi dawtnak a um ti lo. Hihi cu a chung lei a man sunlawinak le a lianngannak hmuh khawhnak caah a leng lei tuah sernak zong a si ve.Cu caah amah he i tonnak can tha ngei lengmang i, kan thlarau rawlttamnak phyeshindingah amah sinah pel lo tein kal zungzal i zuam u sih.
A dawtnak nganpi he a kan hngak zungzalnak cu a tang lei bantuk in a si.
" Ka fa dawt, na nu le na pa nih cun an philh men lai, a sinatein keimah nih cun nangmah lawng vakvai dingah kan kal tak kho lai lo. " A dongh khawh lomi dawtnak he kan dawt i, ka dawtnak cu nangmah caah a um zungzal". (Jer 31:3)
Ka thih hmanh ah ka fale hi ngaktta bang in ka chiah tak kho hna lo. Ni fatin le zan fatin tein ka theng cungah an ka ton kho. A nembikmi "Nu" thongkhat hna dawtnak in a hnu bik zanriah einak cu, a thlumdeuh nakin a khaa bikmi Kalvary tlang ah a rak cang, zeiruang ah ti ahcun hi ka pum le ka sa chungin nu le pa nan ngei lai i, zeitik hmanh ah pakhat lawng nan um lai lo i, nan li a leng lai lo tikha ka theih. Cu ruangah pei nanmah caah ka tuar i, keimah caah ka nun kho lo mi kha ka ruat bal natein keimah le pum i pek i Changreu chungah toidawrnak he ka rak um cu" a ti.
Dawtmi u le nau hna, voikhat cu tarnu pakhat a rak um i a fanu nih a hruai mi a dang biaknak ah a vakal ve i, sau pi a um hnu ah, a um tonnak Parish ah a rak kir i, a Siangboipa sinah a chimmi cu, "Father a leng lei ka rak um liocu ka thlarau rawl a rak tamtuk i, ka tizong a rak hal tuk cuta, ka nunnak ah pakhat khat abau rih ti bantuk in ka rak um. Curuangah atu thlarau rawl ei than dingah ka rak kir than," tiah a ti. Catholic Krifa pakhat si ve dingah a kan auh i, kan nunnak ah a herhmi pek dingah tim cia tein a kan um pi zungzal mi Pathian he nai chin chin usih tiah thazang pek buin,
Sr. Monica Zung Meng fmm
Our Lady of Lanka Provincial house,
Colombo 8, Sri Lanka.