MISSA RAITHAWINAK HRAMTHAWHNAK

1. LUHNAK HLA                                (Dir)

2. BIACHAWNHNAK

T.        Pa, le Fapa, le Thiang Thlarau min in,
K.       Amen.
T.        Kan Bawipa Jesu Kri vel zangfahnak, Pa Pathian dawtnak le Thiang Thlarau hawikomhnak cu nan sinah                   um ko seh.     (2 Cor. 13:14)
K.        Mangmah sin zongah um ko seh.

                            ( siloah )

T.        Dominus vobiscum.        (Nan sinah Bawipa um ko seh)
K.       Et cum spiritu tuo.          (Nangmah sin zongah um ko seh)

3.        TI THIANG THEHNAK
4.        SUALPHUANNAK

T.        U le nau hna, a thiang mi Missa thawinak tuah awhah a tlak mi kan sinak hnga kan sualnak kha phuang cio             u sih.
                 (Daite in sualnak ruah awk)

T & K   Zeizong tuah kho Pathian sinah le nanmah sinah u le nau hna, ka ruahnak, ka hmurka, ka tuahnak le tuah             ka tlolhnak in ka sual tuk hringhran, tiah ka suallnak ka phuan. ( Taang cumh pah in) Keimah palhnak in,                 keimah palhnak in, keimah nganbik palh nak in ka sual cang. Cu caah Thlauchauhnak a hmu mi a zungzal             Ngaknu Thiang Mary, vanmi hna le mithiang vialte hna le u le nau hna, nanmah kha Bawipa kan Pathian sinah          thla ka campiak u, tiah kan nawl ko hna.

T.      Zeizong tuah kho Pathian nih kan zangfah sehlaw, kan sualnak ngaihthiam in zungzal nunnak ah kan hraui ko         seh.

K.        Amen  

         

Kyrie
T. Bawipa, run kan zangfah ko tuah.
K. Bawipa, run kan zangfah ko tuah.
T. Kri, run kan zangfah ko tuah.
K. Kri, run kan zangfah ko tuah.
T. Bawipa, run kan zangfah ko tuah.
K. Bawipa, run kan zangfah ko tuah.
Hymn Lyrics
1. [Lungthleng mi hna khamh awkah a ra mi,
Maw kan Bawipa, run kan zangfah ko.]2
2. [Misual mi hna khamh awkah a ra mi,
Kri kan Bawipa, run kan zangfah ko.] 2
3. [Pa orhlei in kanmah caah kan nawl piak,
Maw kan Bawipa, run kan zangfah ko.] 2

Gloria

        Cungchin Pathian sinah sunparnak um ko seh, Leicung miding hna sinah daih nak tlung cang ko seh. Bawipa Pathian, Vancung Siangpahrang, zeizong tuahkho Pa Pathian, kanin thangthat, thluachuah kanin pek, kanin biak, sunpar kanin pek, na sunpar lianngannak caah lawmhnak kanin pek.
        Bawipa Jesu Kri, Pathian Fapa ngeihchun; Bawipa Pathian, Pathian Tuufa, hi vawlei sualnak a kalpitu, run kan zangfah ko tuah. Pathian Tuufa, hi vawlei sualnak a kalpitu, kan thlacamnak rak cohlang ko. Pa Pathian orhleikam i a thu mi, run kan zangfah ko tuah. Zeitintiah Nangmaih lawng na thiang, Nangmaih lawng Bawipa na si, Nangmaih lawng a sangbik na si, maw Jesu Kri, Thiang Thlarau he hmunkhat in, Pa Pathian sunparnak chungah. Amen.

Hymn Lyrics
T. Cungchin Pathian sinah thangthatnak um seh.

1. Lungthin tha lei mi cungah, Na daihnak tlung cang ko seh; Lianngan mi kan Pa Pathian,Zeizong tuah kho Siangpahrang,Nangmaih lawng kanin cawnglawmh,Kanin chimthiam, kanin biak,Na min thangthatnak ca'h,Lawmhnak kanin pek.
2. Pa Pathian ngeihchun Fapa,Kan Bawipa Jesu Kri cu,Leicung sualnak kalpitu,Pathian Tuufa, kan Bawipa,Kannih kha kan zangfah tuah, Pa Pathian orhlei thu mi, Kan thlacamnak kha, Bawipa, rak cohlang ko.
3. Zeitintiah Nangmaih lawng kha, A thiangbik cem mi na si; Nangmaih lawng Bawipa na si; Nangmaih lawng a sangbik na si; Maw kan Bawipa Jesu Kri, Thiang Thlarau he hmunkhat in, Kan Pa Pathian sunparnak chungah. Amen.

Collecta
T. Thlacam u sih (adih tikah)
K. Amen.

LITURGY OF THE WORD
BAIBAL THIANG RELNAK

Voikhatnak Baibal Relnak.
(adih tikah)
R.athian bia a si.K. Pathian cungah lawmhnak um ko seh.

Psalm Chawnhlehnak

Voihnihnak Baibal Relnak
(adih tikah)R. Pathian bia a si.
K. Pathian cungah lawmhnak um ko seh.

Alleluia (Lent caan lo vialte ah)

Thawngtha Aupinak (Lent caan chungah)

K. 1. Na cungah thangthatnak le upatnak um ko seh, Bawipa Jesu Kri.
     2. Na cungah sunparnak le thangthatnak um ko seh, Bawipa Jesu Kri.

Thawngthabia Relnak
T. Nan sinah Bawipa um ko seh.
K. Nangmaih sin zongah um ko seh.

T. Mithiang (N.) a tial mi bangin Thawng-thabia relnak.
K. Nangmaih cungah sunparnak um ko seh, Bawipa.
(reldih tikah)

T. Mah hi Bawipa Thawngthabia a si.
K. Na cungah thangthatnak um ko seh, Bawi Jesu Kri.

Credo

        Pathian pakhat ka zumh,Van le vawlei le hmuh khawh mi hmuh khawhlo mi vialte sertu, a zungzal in a hmun mi Pathian pakhat lawng ka zumh. Pathian Fapa ngeihchun a si mi Bawipa pakhat Jesu Kri kha ka zumh. Khuacaan a um hlanah Pa sinin hrinnak a in, Pathian in Pathian, Ceu-nak in Ceunak, Pathian ngaite in Pathian ngaite; sermi a si lo hrin mi a si; Pa Pathian he an i khat i zeizong vialte kha a ser dih.
         Kannih minung caah le kan khamhnak caah vancung in a rung tum: Thiang Thlarau thawnnak in Ngaknu Thiang Mary chungah thisa semnak a lak i, minung ah a cang. Pontias Pilat kutah kanmah caah vailam an tah, a thi i an vui. Baibal tialtak bangin nithumnak ah a thothan. Vancung ah a kai i Pa Pathian orhleikam ah a thu. Cun mithi le minung biaceih awkah sunparnak in a rung tum than lai i a pennak cu dong loin a hmun lai.
        Bawipa le nunnak petu Thiang Thlarau ka zumh. Amah cu Pa le Fapa sinin a rung chuak. Pa le Fapa he hmunkhat in biak le thangthat a si. Amah cu Profet hna in bia a chim. Pakhat a si mi, a thiang mi, mi vialte ca a si mi le lamkaltu hna he aa pehtlaih mi Katholik Bupi ka zumh. Sual ngaihthiamnak caah Baptismas pakhat ka zumh. Mithi thawhthannak le a ra lai mi zungzal nunnak ka hngak. Amen.

Hymn Lyrics
T. Pathian pakhat lawngte ka zumh.
1. Zeizong tuah kho kan Pa Pathian ka zumh; Van le vawlei a Sertu.
Bawipa Jesu Kri, Pathian Fapa ngeihchun, Zungzal in hrin mi ka zumh.
2. Pathian in Pathian, Ceunak in Ceunak; Pathian ngaite in Pathian;
Ser mi a si lo, hrin mi Fapa a si, Pa Pathian he an i khat.
3. Amah thawngin zeizong te ser a si.Kanmah le kan khamhnak ca;
Vancung ram in hi vawlei ah a rung tum, Thiang Thlarau thawnnak thawngin.
4. Ngaknu thiang Mary chungin nau a sem; Minung taktak ah a cang;
Pontias Pilat kutah vailam an tah, Kan ca'h a thi i an vui.
5. Nithumnak ah lianngan in a thothan, Baibal thiang tialtak bangin;
Sunpar lianngannak he vancung ah a kai; Pathian orhlei ah a thu.
6. Mithi minung vialte biaceih awkah; Sunparnak he a tum lai;
A pennak cu zungzal dong lo a hmun lai. Hi bia vialte cu ka zumh.
7. Bawipa le nunnak pe tu Thiang Thlarau; Pa Fapa in a chuak mi;
Pa le Fapa he biak le thangthat a si; Profet hna in bia a chim.
8. Pakhat le a thiang Katholik Bupi; Lamkaltu he a pehmi;
Sual ngaihthiamnak le pum thawhthannak ka zumh;
A zungzal nunnak ka hngak. Amen.

Halnak a phunphun (Mt 7:7)

T. Ka dawtmi u le nau hna, "Hal u law, pek nan si lai; kawl u law, nan hmuh lai; king u law, innka hunh nan si lai," tiah Bawi Jesu Kri nih a kan chimh bantuk in Katholik Bupi ca le a herh mi vialte kha Jesu Kri min in kan Pa Pathian sinah lungkhat tein hal u sih.

1. Kan nu Bupi kha thluachuah vanluh na peknak hnga caah: K. Maw Bawipa kan Pa Pathian, nang kha kanin hal.

2. Kan Pope (N.) kha na kilven i na zohkhenhnak hnga caah:
3. Siangbawi hna, brother, sister hna le saya hna nih na duhnak bang an zulh khawhnak hnga caah:
4. Mino tampi cungah, Pathian riantuan duhnak lungthin na peknak hnga caah:
5. Vawlei cung kakip ah, remnak le daihnak a umnak hnga caah:
    (a tang halnak hna chungin pahnih pathum le a herhnak bangin a dang zong chapchih awk a si)
1. Krifa vialte hna kha lungthin khatte na siternak hnga caah.
2. Kri a zum rih lo mi hna kha ceunak na peknak hnga caah.
3. Bawipa Jesu Kri caah sifah harnak le hremnak a ingmi hna kha thazang na peknak hnga caah.
4. A daithlang mi Krifa unau hna kha biaknak lei ah na zuamter thannak hnga caah.
5. Biatak a kaltak mi kan unau hna kha na tuukawm chungah na luhter thannak hnga caah.
6. Atu biaknak ah aa tel mi kannih vialte kha zumhnak, ruahchannak le dawtnak chungah na kan hmunhternak hnga  
    caah.
7. Kawlram chungah Bawipa pennak a kauhnak hnga caah.
8. Krifa unau hna nih a hmaan mi dawtnak taktak ngeih in lungkhat thinkhat in an um khawhnak hnga caah.
9. Kannih le Krifa vialte hna kha kan thih tiang zumhnak chungah na kan hmunh-ternak hnga caah.
10. A zaw mi kan u le nau hna kha damnak na peknak hnga caah.
11. Na daihnak chungah kan thih khawhnak hnga caah.
12. A thi cia mi hna an thlarau cu na zangfahnak hmu in daihnak ah an i dinh khawhnak hnga caah.
13. Nifate kan herh mi tirawl le ngandamnak kha na kan peknak hnga caah.
14. Thlaikho kha na thanter i rawhralnak in na himternak hnga caah.
15. Ti le mei le thlichia ral in na kan khamhnak hnga caah.
16. Zawtfahnak, mangtam le raltuknak in na kan khamhnak hnga caah.
17. Kan tuukhal a si mi Bishop (N.) kha na zohkhenhnak i na miphun kha lam dingin na hruaiter khawhnak hnga 
      caah.
T. Kan thazang le kan dornak a si mi maw Bawipa Pathian, Jesu Kri min in na dawt mi na fale hna kan halnak hi run kan copiak ko.
K. Amen.

LITURGY OF THE EUCHARIST
PEKCHANHNAK

Changreu Pekchanhnak

T. Zeizong vialte sertu Bawipa Pathian, Nangmaih cu thluachuah mi na si. Nangmaih thatnak thawngin vawlei in a chuak mi le minung kut in ser mi hi changreu hi kanin pekchan. Hi changreu cu kanmah caah nunnak changreu ah a cang lai.

K. Pathian cungah thluachuah um zungzal ko seh.

Misurhang Pekchanhnak

T. Zeizong vialte sertu Bawipa Pathian, Nangmaih cu thluachuah mi na si. Nangmaih thatnak thawngin misur theitlai le minung kut riantuannak in kan hmuh mi hi misur hang hi Nangmaih sinah kanin pekchan. Hi misurhang cu kanmah caah thlarau din awk ti ah a cang lai.

K. Pathian cungah thluachuah um zungzal ko seh.

T. U le nau hna, kanmah i pekchanh mi laksawng hi zeizong tuahkho Pa Pathian hmai ah a cotlak mi a sinak hnga, thlacam ko u.

K. A min thangthatnak le sunparnak ca le, kanmah le a Bupi dihlak thatnak caah, Bawipa nih na kut in pekchanh mi thawinak hi rak cohlang ko seh.

Laksawng cung thlacamnak
T. Thlacam u sih (adih tikah)
K. Amen.

EUCHARISTIC PRAYER II
BAWIPA THISA THLACAMNAK II

T. Nan sinah Bawipa um ko seh.
K. Nangmaih sin zongah um ko seh.

T. Nan thinlung i hliphlau u.
K. Bawipa sinah kan thinlung kanni hliph-lau ko.

T. Bawipa kan Pathian kha lawm cio u sih.
K. A tlak i a ding ko.

Lawmhnak Bia

T. Kan Pa, na dawtbik mi na Fapa Jesu Kri thawngin a zungzal catloin khuazakip ah lawmhnak pek hi, kan rian le kan khamhnak a si. Amah cu zeizong vialte na sernak na Bia a si i, kanmah tlank awk ah Khamhtu in na rak thlah. Thiang Thlarau thawnnak in minung sinak a lak i, Ngaknu Thiang Mary nih a hrin. Kanmah caah vailam cungah a za a zau; thihnak kha a hrawh i thawhthan nak kha a langhter. Hibantuk in anih nih na duhnak kha a tlinter i, miphun thiang kha an hmuh piak. Cu a si caah vancung mi le mithiang vialte hna he na sunparnak kha kan thanh i aw khat tein kan sa.

Acclamatio
A thiang, a thiang, a thiang van ralkap run Bawipa Pathian! Van le vawlei cu na sunparnak he a khat. A sangbik cunglei ah Hosana um ko seh! Bawipa minin a ra mi cu thluachuah mi a si. A sangbik cunglei ah Hosanna um ko seh.

Hymn Lyrics
        A thiang, a thiang, lianngan Bawipa Pathian, A thiang i lei le van thangthatnak he a khat. A sangbik ah Hosanna um ko seh. Bawipa min in a ra mi nih thluachuahnak hmu seh. A sangbik ah Hosanna Hosanna, a sangbik ah Hosanna um ko seh.

Thiang Thlarau Auhnak

Bawipa, Nangmaih cu a thiang taktak mi na si i, thiannak vialte chuahnak tiput na si.Hi laksawng hna hi na Thiang Thlarau in run thianter hna law kanmah caah kan Bawipa Jesu Kri † pum le thi ah rak canter ko hna.

Bawipa Zanriah

Kan Bawipa Jesu Kri cu amah lungtho tein thihnak ah a pum aa pek hlanah changreu kha a lak i Nangmaih sinah lawmhnak bia kha a chim. Changreu kha a cheu i a zultu kha a pek hna i, hiti hin a chim:

            Mahhi i lak u law, nan dihlak in ei u: mahhi cu nanmah caah
pek hnga mi ka Pum a si. Cubantukin zanriah an ei dih tikah, hrai kha a lak. Nangmaih sinah
lunglawmhnak le thangthat nak kha a chim than i, hrai kha a zultu kha a pek hna i hi ti hin a chim:
Mahhi i lak u law nan dihlak in ding u. Mahhi cu a thar le a hmun zungzal mi biakam nak a fehter mi ka thi hrai a si. Hi thi cu nanmah le mi vialte caah, sualnak hna ngaihthiam awk caah thlet a si lai. Mahhi keimah ruahnolhnak in tuah u.

T. Zumhnak biathuk a si.

K. 1. Kri a thi cang, Kri a thothan, Kri a ra than lai.
     2. Thihnak in kan thihnak kha na hrawh.

Thawhthannak in kan nunnak na kan hmuhpiak.
Bawi Jesu, sunparnak in ra ko cang.

Ruahnolh Thlacamnak

        Amah thihnak le thawhthannak kha ruahnolh in, maw kan Pa, Nangmaih sinah hi nunnak a pe mi changreu le hi khamhnak hrai hi kanin pekchanh. Kanmah kha na hmaika i dir awkah le na riantuan awkah a tlak mi bangin na kan rel caah na cungah kan i lawm ngaite.
(Thiang Thlarau Auhnak) Kri pum le thi aa hrawm mi kannih vialte kha Thiang Thlarau nih pumkhat ah kan komh ko seh.

Bupi caah

        Bawipa, vawlei cung kakip i a um mi na Bupi kha rak philh hin hlah. Kanmah cu kan Pope (N.) kan Bishop (N.) le tlangbawi vialte he hmunkhat in dawtnak chungah kan thanter ko tuah.

_______________

Mithi Missa ah

        Hi vawlei nunnak in na auh cang mi (N.) hi rak philh hin hlah. Amah cu tipilnak ah Kri he a thi cang i, a thawhthannak zong kha rak hrawmter ve ko tuah.

_______________
Mithi caah

        Thawhthannak ruahchan in aa din cang mi kan u le nau hna kha rak philh hin hna hlah law, anmah hna le mithi vialte hna kha na umnak i ceunak chungah rak luhter ko hna.

Mithiang mi hna he komhnak

        Kanmah vialte zong run kan zangfah ko tuah. Ngaknu Thiang Pathian Nu Mary, lamkaltu hna le a chanchan ah Nangmaih duhnak a tuah mi mithiang vialte hna he zungzal nunnak hrawmtlak mi kan siter ko. Kanmah cu anmah hna he hmunkhat in Nangmaih kha kanin thangthat i sunparnak kanin pek khawhnak lai run kan bawm ko, na Fapa Jesu Kri thawngin.

Donghnak thangthatnak

T. Amah thawngin, amah he, amah chungah,    zeizong tuah kho Pa Pathian,    Thiang Thlarau komhnak chungah sunparnak le upatnak vialte cu,    Nangmaih ta a si, a zungzal dong hin loin.    K. Amen.

EUCHARISTIC PRAYER III
BAWIPA THISA THLACAMNAK III

        Kan Pa, Nangmaih cu a thiang taktak mi na si i, sermi thil vialte nih a tlak tein an in thangthat. Nunnnak le thiannak vialte cu na Fapa Jesu Kri kan Bawipa thawng le Thiang Thlarau rian tuannak in Nangmaih sinin a si dih. Nichuahlei in nitlaklei tiang na min thiang thangthatnak caah a tling mi thawinak kha tuah awkah chankhat hnu chankhat miphun phunkhat kha nang mah sinah na pumh hna.

Thiang Thlarau auhnak

Cu a si caah kan Pa, na sinah hi laksawng hna hi kan rak put. Hi laksawng hna hi na Thlarau thawnnak in run thianter hna law, kan Bawipa Jesu Kri † Pum le Thi ah rak canter ko hna tiah kanin nawl, amah nawl peknak bangin hi lunglawmh thawinak cu kan tuah.

Bawi Zanriah

        Bawi Jesu cu an rawi zanah changreu kha a lak i, Nangmaih sinah lawmhnak le thangthatnak kha a chim. Changreu kha a cheu i a zultu kha a pek hna i, hi ti hin a chim:    
      Mahhi i lak u law, nan dihlak in ei u:   Mahhi cu nanmah caah pek hnga mi ka Pum a si.

Cubantukin zanriah an ei dih tikah, hrai kha a lak. Nangmaih sinah lunglawmhnak le thangthat nak kha a chim than i, hrai kha a zultu kha a pek hna i hi ti hin a chim:    
        Mahhi i lak u law nan dihlak in ding u. Mahhi cu a thar le a hmun zungzal mi biakamnak a fehter mi ka thi hrai a si.    Hi thi cu nanmah le mi vialte caah, sualnak hna ngaihthiam awk caah thlet a si lai. Mahhi keimah ruahnolhnak in tuah u.

T. Zumhnak biathuk a si.
K. 1. Kri a thi cang,    Kri a thothan, Kri a ra than lai.
     2. Hi changreu kan ei i hi hrai kan din tikah,
Sunparnak he na rak hlantiang,
Na thihnak kong kha kan thanh, maw Bawi Jesu.

Ruahnolh thlacamnak

        Kan Pa, na Fapa nih kanmah khamhnak caah a in mi thihnak, khuaruahhar awk a thawh thannak le vancung a kainak kha ruahnolh in le, a rat than tikah don awkah i timh buin, lawmhnak he hi a thiang i a nung mi thawinak kha kanin pekchanh. Na Bupi pekchanh mi cungah lungsinak in rak zoh ko law, a thihnak in Nangmaih he a kan remtertu thawinak ingtu hi rak zoh ko tuah. Kri pum le thi in cawm a si mi kannih kha a Thiang Thlarau in kan khahter law, Kri ah pumkhat, lungthin khat kan siter ko.

Mithiang hna he komhnak

            Kri nih kannih kha na caah a zungzal a hmun mi laksawng ah kan ser hram seh law, Ngaknu Thiang Pathian Nu Mary, Lamkaltu hna le Martar hna, (mithiang N.) le mithiang vialte hna he hmunkhat in na mithiang hna nih an co mi ro kha kan hrawmter ve ko tuah. Cat lo an thlacam piak-nak in bawmhnak kan hmuh lai tiah kan i bochan ko.

Bupi caah
Bawipa, Nangmaih he a kan remtertu hi thawinak nih hin vawlei cung kakip ah daihnak le khamhnak run pe hram ko

seh. Vawlei cungah khual a tlawng lio mi na Bupi kha na sal Pope (N.) le kan bishop (N.) le bishop vialte hna, tlangbawi hna le na Fapa nih an hmuhpiak mi miphun dihlak he zumhnak le dawtnak ah rak thawnter ko.    Kan Pa, hika na hmaika i na pumh mi na chungkhar hna i thlacamnak hi run ngaihpiak ko hna. Na zangfahnak le dawtnak in na fale vialte hna cu khuazeipaoh an umnak ah lungkhat thinkhat te rak siter ko hna.

Mithi caah

        A thi cia mi kan u le nau hna le, Nangmaih hawikomhnak chungah hi vawlei in a kal cang mi vialte hna kha na pennak chungah rak luhter ko hna.Kannih zong thatnak vialte a rak chuahnak a si mi Kri kan Bawipa thawngin na sunparnak kha hmu in, zungzal in kan i nuam te lai tiah kan i ruahchan ko.

_______________
Mithi Missa ah

(N.) hi rak philh hin hlah. Amah cu tipilnak ah Kri he a thi cang; Kri nih thih hmang mi kan pum kha a thawhter tikah le sunparnak chungah amah pum bantukin a ser tikah, a thawh thannak kha rak hrawmter ve ko tuah. Athi cia mi kan u le nau hna le, Nangmaih hawikomhnak chungah hi vawlei in a kal cang mi vialte hna kha na pennak chungah rak luhter ko hna.
Khika ah na sunparnak kha kan i hrawm ve lai i kan mitthli vialte cu hnawh a si lai tiah kan i ruahchan ko. Khi ni ah, kan Pathian, Nangmaih kha na sining tein kanin hmuh te lai. Nangmaih bantuk kan si lai i thatnak vialte a rak chuahnak a si mi kan Bawipa Kri thawngin Nangmaih kha kanin thang that zungzal lai.

_______________
Donghnak thangthatnak

T. Amah thawngin, amah he, amah chungah, zeizong tuah kho Pa Pathian, Thiang Thlarau komhnak chungah,
sunparnak le upatnak vialte cu, Nangmaih ta a si, zungzal dong hin lo in. K. Amen.

COMMUNION RITE
BAWIPA THISA EINAK
Bawipa Thlacamnak

T. Khamhtupa nih a kan cawnpiak mi thlacamnak kha zumhnak in cam u sih.
T & K. Vancung a um kan Pa, na min thiang ko seh; na pennak tlung cang ko seh; vancung bantuk in lei cungah na 
          duhnak tling cang ko seh. Nifa kan herh mi rawl kha nihin kan pe ko sawh. Mi nih kan cung i an sual tikah   
          kan ngaihthiam hna bangin kan sualnak kha kan ngaithiam ve tuah; sualfawrhnak ah phakter loin, thatlo-nak 
          in kan khamh tuah.

T. Bawipa, thatlonak vialte in kan khamh ko, tiah kannin nawl. Atu kan chan chungah daihnak run kan pe ko. Na  
    zangfahnak in sualnak in kan luatter law, lungretheihnak a phunphun khan kan huppheng ko tuah. Kannih cu kan 
    Khamhtu Jesu Kri ratnak kha ruahchan in kan hngak ko.
K. Zeitintiah, pennak, nawlngeihnak le sunparnak cu Nangmaih ta a si, a zungzal dong hin lo in.

T. Bawipa Jesu Kri, na lamkaltu hna sinah, ''Nanmah sinah daihnak kan chiahtak hna; keimah daihnak kan pek hna,'' tiah na chim bangin kan sualnak kha zoh hlahlaw, na Bupi zumhnak kha zoh in, na pennak i daihnak le lungkhahnak kha run kan pe ko, a zungzal a nung i a kan uktu Bawipa.
K. Amen.

T. Bawipa daihnak cu nan sinah um zungzal ko seh.
K. Nangmaih sin zongah um ko seh.
T. Pakhat le pakhat daihnak hmelchunhnak i pe u sih.

Fractio Panis
K. Pathian Tuufa, hi vawlei sualnak a kalpitu, run kan zangfah ko tuah. Pathian Tuufa, hi vawlei sualnak a
kalpitu, run kan zangfah ko tuah. Pathian Tuufa, hi vawlei sualnak a kalpitu, daihnak kan pe ko.

Bawipa Thi le Sa ei hlan Thlacamnak

Bawipa Thisa Hlannak

T. Pathian Tuufa hi zoh hmanh u! Hi vawlei sualnak a kalpitu hi zoh hmanh u. Tuufa rawldanghnak puai ah kawhnak a 
    hmu mi hna cu thluahchuah mi an si.
K. Bawipa, Nangmaih cohlan awkah kaa tlak lo; sihmansehlaw bia kaa khat lawng chim law keimah cu ka dam ko lai.

Bawipa thi sa pek lio ah

T. Kri pum a si.
K. Amen.

Bawipa Thisa Ei Hnu Thlacamnak

T. Thlacam u sih. (A dongh tikah)
K. Amen.

CONCLUDING RITE
DONGHNAK
Biakchawnhnak

T. Nan sinah Bawipa um ko seh.
K. Nangmaih sin zongah um ko seh.

Thluachuah peknak

T. Zeizong tuah kho Pathian, Pa le Fapa le Thiang Thlarau nih thluachuah in pe ko hna seh.
P. Amen.

Thlahnak

T. (A) Missa a dih cang. Daihnak he va kal ko cang u.
   (B) Kri daihnak he va kal ko cang u.
    (C) Daihnak he va kal u law dawtnak in Bawipa rian kha va tuan tuah u.
K. Pathian, cungah lawmhnak um ko seh.

@@@@@@@

TPrefaces in Hakha

LAWMHNAK BIA HNA

Advent I

            Kan Pa, zeizong vialte a tuah kho i a zungzal a nung mi Pathian, kannih nih a zungzal cat loin khuazakip ah kan Bawipa Jesu Kri thawngin lawmhnak kanin pek. Minung in kan sin rat awkah amah le mah aa niamter tikah hlanliopi in na rak tinh mi na khuakhannak kha a tlinter i, kan caah khamhnak lam kha a hun. Atu ah kannih nih Kri kan Bawipa sunparnak he a rat than tik i kanmah sinah kamh mi khamhnak kan ta si lai ni kha ruahchan in kan hngak. Cu asicaah vancung i vanmi hlaremhbu vialte he na sunparnak kha kan thanh i, dong loin an sak mi thangthatnak hla kha kan sak ve.

Krismas I

            Kan Pa, zeizong vialte a tuah kho i zungzal a nung mi Pathian, kannih nih a zungzal cat loin khuazakip ah kan Bawipa Jesu Kri thawngin lawmhnak kanin pek. Khuaruahar minung gcannak ah zungzal a hmun mi na Bia nih zumhnak mit ah na sunparnak kha a thar le a tleu in a langhter. Amah chungah kan Pathian cu kan hmuh khawh. Cuticun kan muh khawhlo mi Pathian a dawtnak nih a kan dawp. Cu asicaah vancung i vanmi hlaremh bu vialte he na sunparnak kha kan thanh i, dong loin an sak mi thangthatnak hla kha kan sak ve.

Lent I

            Kan Pa, zeizong vialte a tuah kho i a zungzal a nung mi Pathian, kannih nih a zungzal cat loin khuazakip ah kan Bawipa Jesu Kri thawngin lawmhnak kanin pek. Hi velngeihnak khuacaan hi thlarau ah kan tharchuahnak hnga na chungkhar sinah na kan pek mi laksawng a si. Kan lungthin thenh awk, kan pumsa duhnak i sum awk le luatnak in na rian tuan awkah thazang na kan pek. A liam lengmang mi hi vawlei kan nunlio ah kan lungthin kha vancung ah chiah in zeitin nun awk a si ti kha na kan cawnpiak. Atu ah, mithiang hna le vanmi vialte he, kanin thangthat zungzal.

Thawhthan I

( Thawhthan Zarh chung hman awk)

        Kan Pa, zeizong vialte a tuah kho i a zungzal a nung mi Pathian, kannih nih a zungzal cat loin khuazakip ah kan Bawipa Jesu Kri thawngin lawmhnak kanin pek.Kri kan lanhtak thawinak a can caan, hi thawhthan zan (ni) (caan) chungah hin a ngan deuh chinchin mi lawmhnak in kanin thangthat. Amah cu hi vawlei sualnak a kalpitu Tuufa taktak a si.  A thihnak in kan thihnak kha a hrawh;  A thawhthannak in kan nunnak kha a hmuh than. Cu asicaah vancung i vanmi hlaremh bu vialte he na sunparnak kha kan thanh i, dong loin an sak mi thangthatnak hla kha kan sak ve.

Thawhthan II

            Kan Pa, zeizong vialte a tuah kho i a zungzal a nung mi pathian, kannih nih a zungzal cat loin khuazakip ah kan Bawipa Jesu Kri thawngin lawmhnak kanin pek. Kri kan lanhtak thawinak a can caan, hi thawhthan caan ah hin a ngan deuh chinchin mi lawmhank in kanin thangthat. Anih nih ceunak fale ah a kan ser.  Zungzal nunnak thar ah a kan cawisan.  Amah a zum mi hna kha luhpi awkah vancung innka kha a hun cang.  A thihnak cu thihnak in a kan tlanhnak a si, a thawhthannak cu nunnak ah kan thawhthannak a si. Van hlaremhbu nih na sunparnak kha an sak lio ah, thawhthan lawmhnak nih vawlei pumpaluk kha a tharchuah.

Vancung Kai Puai

Kan Pa zeizong vialte a tuah kho i a zungzal a nung mi Pathian, kannih nih a zungzal cat loin khuazakip ah lawmhnak kanin pek. (Nihin) Bawi Jesu, a lianngan Siangpahrang, sualnak le thihnak Teitu cu, vanmi hna nih a thangthatnak hla an sak lio ah vancung ah a kai. Kri, Pathian le minung karlak tangtu, vawlei biaceihtu le mi vialte Bawipa cu, kan mithmuhnak pinlei ah a liam, a kan hlawt caah a si lo, kan ruahchannak si awk caah a si. Kri cu hramthawhnak, Bupi lu a si; A kalnak ah zulh awk kan i ruahchan.Van hlaremh bu nih na sunparnak an sak lio ah, thawhthan lawmhnak nih vawlei pumpaluk kha a tharchuah.

Pentecost Puai

        Kan Pa, zeizong vialte a tuah kho i a zungzal a nung mi Pathian, kannih nih a zungzal cat loin khuazakip ah lawmhnak kanin pek. Nihin na Fapa neihchunh i nunnak kha hrawmnak in, na fale si awkah na tinh mi hna cungah Thiang Thalarau kha na rak thlah. Cuticun lanhtak biathuk kha na tlinter.Nihin ah Thiang Thlarau nih mi vialte kha a hmaan mi Pathian pakhat kha a hngalhter hna i holh phunkip nih zumhnak pakhat kha aw khat tein an phuan ni, na Bupi hramthawhnak puai kha kan tuah.Van hlaremh bu nih na sunparnak an sak lio ah, thawhthan lawmhnak nih vawlei pumpaluk kha a tharchuah.

Thumkomh Pathian Puai

            Kan Pa, zeizong vialte a tuah kho i a zungzal a nung mi Pathian, kannih nih a zungzal cat loin khuazakip ah lawmhnak kanin pek. Kannih nih Pathian na sinak kong biathuk cung i kan zumhnak kha lunglawm ngai in kan phuan. Na sunparnak kha na Fapa i sunparnak le Thiang Thlarau i sunparnak zongin na phuan cang: sunpar lianngannak ah aa tluk mi Mi (Persons) Pathum, ceunak le dawhnak ah aa thenlo mi, Bawipa pakhat, Pathian pakhat na si thiamthiam i, zungzal a hmun mi na sunparnak ah biak zungzal awk na si. Cu asicaah, vancung i vanmi hlaremh bu he na sunparnak kha kan thanh i dong loin an sak i thangthatnak hla kha kan sak ve.

Bawipa Thisa Thiang

        Kan Pa, zeizong vialte a tuah kho i a zungzal a nung mi Pathian, kannih nih a zungzal cat loin khuazakip ah kan Bawipa Jesu Kri thawngin lawmhnak kan in pek.  Hmanungbik zanriah ei lio ah, a lamkaltu hna he cabuai ah a thu i, nangmah kha thangthatnak tling an pe i cotlak mi laksawng, dotla tuufa in nangmah sinah a pum kha a pek. Kri nih hi a temhinnak philhlonak kha caan a dongh hlantiang khamhnak a pe mi thawnnak kan hmuh awk caah a kan pek. Hi sacrament sunglawi ah hin na miphun kha na dangh hna i, an thiannak hnga thazang na pek hna i, minung chungkhar kha zumhnak pakhat i ceunak le dawtnak pakhat chungah na nunter hna. Cu asicaah hi khuaruahhar sacrament kha ei awkah na cabuai ah kan ra i, a thothan mi Kri he i lawhnak ah kan thang. Vawlei cu van he sernak hla thar kha sak awkah aa komh i, kannih nih nangmah kha  kanin biak i kanin thangthat zungzal.

Kri Siangpahrang Puai

            Kan Pa, zeizong vialte a tuah kho i a zungzal a nung mi Pathian, kannih nih a zungzal cat loin khuazakip ah lawmhnak kanin pek. Jesu Kri, na Fapa ngeihchun kha, a zungzal tlangbawi le van le vawlei siangpahrang caah lawmhnak chiti na thuh. Tlangbawi a sinak in vailam biaktheng cungah a nunnak kha a pek i, hi a tling mi daihnak thawinak pakhat in minung phun kha a tlanh. Siangpahrang sinak in sermi vialte cungah uknak nawl kha ka ngei a ti, cucu a lianngan mi a Pa, nangmah sinah a zungzal a hmun i van le vawlei a hup dih mi pennak kha pek awkah a si; Cucu biatak le nunnak pennak, thiannak le vel pennak, dinnak, dawtnak le daihnak pennak a si. Cu asicaah vancung i vanmi hlaremh bu vialte he, na  sunparnsk kha kan thanh i, dong loin an sak mi thangthatnak hla kha kan sak ve.

Thluachuah Ngaknu Thiang Mary Puai

        Kan Pa, zeizong vialte a tuah kho i a zungzal a nung mi Pathian, kannih nih a zungzal cat loin khuazakip ah sunparnak i a um mi na mithiang hna kha kan ruah hna bangin na laksawng hna caah lawmhnak le thangthatnak kha kanin pek. Thluachuah a hmu mi Ngaknu Thiang Mary philhlonak kan tuahnak ah hin a lawmhnak hla sak ve hi ka lunglawmhnak bik a si. Zeibantuk khuaruahharnak dah vawleicung kakip ah khan na tuah cang. Nangmah nih a nauta mi na salnu Mary kha na vun zoh tikah amah kha na Fapa, kan Bawipa, mi vialte Khamhtu, Jesu Kri a Nu si awk caah na cawi. Amah thawngin vancung i vanmi hna nih na hmaika ah an i lawmh bangin an biaknak thlacamnak kha anin pekchanh.Kanmah hna zong anmah hna he aw khat tein teinak thangthatnak hla an sak mi kha kan sak ve.

Mithiang Vialte Puai

            Kan Pa, zeizong vialte a tuah kho i a zungzal a nung mi Pathian, kannih nih a zungzal cat loin khuazakip ah lawhnak kanin pek. Nihin kannih nih van Jerusalem, kan nu, khualipi thiang puai kha kan tuah. Na bawi thutdan velchum ah, mithiang mi, kan u le nau hna nih, na thangthatnak an sa zungzal. An sunparnak nih lawmhnak he a kan khahter i, Bupichungah kanmah he an i komhnak in vel ceunak le thazang a kan pek. Zumhnak khualtlawn kan i namchan lio ah, anmah he ton lai kan i ngaih ngaite.Anmah le vanmi vialte hna he i komh in, na thangthatnak kha kan thanh i, aw khat tein kan au:

Thlarau Thiang Hna Caah

            Kan Pa, zeizong vialte a tuah kho i a zungzal a nung mi Pathain, kan Bawipa Jesu Kri thawngin a zungzal cat loin khuazakip ah nangmah kha a tlak tein lawmhnak le thangthatnak kanin pek. Mithi lakin a thothan mi Kri ah thawhthannak kong kan i ruahchan mi fingrei cu a cat. Thihnak nih a chuahpi mi ngaihchiatnak nih cun thih khawhlonak kong biakamnak kha lam a kianh cang. Bawipa, nangmah kha an zum mi hna caah cun nunnak cu a dong lo, aa thlen lawng a si. Hi vawlei kan pumsa cu thihnak in aa hngilh tikah, vancung ah a zungzal a hmun mi umnak hmun kha kan hmuh lai. Cu caah vancung i vanmi hna he hmunkhat in na sunparnak cu kan thanh i, dong loin na thangthatnak hla kan sa.