Ka dawtmi Krifa u le nau hna nihin cu thaizing in hramthawk hngami
ulhcaan ca ah ttha te-in i timhni a si. Mi cheukhat nih an ruah tawnmi
cu (Fat Tues day) a thaumi cacawn nihnih ni ti hi a si. Hi nih chim a
duh mi cu, thaizing ulhcaan hram aa thawk cang lai ca-ah cheukhat
krifa u nau pawl hna nih, nihin cacawn nihnih ah hin pumsa lei in
nomhnak, ei le din te hna tbk. hi an tuah ttheu tawn. Mah bantuk hi
apalhmi timhtuahnak a rak si. Bawi Jesu ziaza tu kha i lak u law,
pumsa duhnak tuah kha ngol u (Rom.13:14).
Asinain Lent timi ulhcan nih a timh mi cu satan ral donak tu hi a si
deuh. …Thlarau he a do zungzal mi pumsa duhnak kha i teiter hna hlah
u(1Pt. 2:11b). Mithiang Paul nih Kri ralkap ttha tiah a kan auh. Cu
min he auhmi kannih nih thaizing ulhcan (Lenten campaign) cu hram kan
thawk cang lai. Cu caah nihin Fat Tues day ti lei in si ter lo in,
thaizing le ulhcaan chung vialte kan ral donak caah i tim u sih. Kan
ral thuam caah timh cia te-in um u si……raldo awkah hriamnam kha i lak
u sih(Rom.13:12b). …Pathian nawl kha ngai ko uh. Khuachia kha do u
law an zamtak ko hna lai(James 4:7)).
Nihin kan rel mi biathiang nih, thaizing in hram kan thawk hngami Lent
(ulhcaan) caah ruahnak asi lo ah ralrinnak a kan pek…zumhawk tlak lo
minung hna! Vawlei he i hawikomh hi Pathian he i ral a si ti kha nan
hngal lo maw? Vawlei hawikom si a duh mi paoh nih cun Pathian ral ah
an i ser ko (James 4:4). Hi bantuk in ulhcaan chungah hin minung
kaplei in si lo in Pathian kaplei in hmurka, thinlung, nunttha i zuam
hna u sih! Nihin kan thawngttha bia ah kan lak khawh tthan mi cu,
ulhcaan chungah hin zeitin cawlcang ding a si ti mi Jesu bia nih a kan
fawrh tthan… “Kamin in hi ngakchia pakhat khat a cohlang mi paoh cu
Keinah a ka cohlan a si; cun Keimah a ka cohlang mi paoh cu Keimah
lawng kha a ka cohlan silo in a ka Thlahtu zong kha a cohlan a si,”
tiah a ti. Hi ulhcaan chungah caandang dangnak in hngakchia sining he
minung hna tampi cungah zawn ruahnak phunphun kan thilti khawh ning
cio tein tthatnak kan tuah khawh ding in a kan fawrh tthan. Mah vialte
kha tawidawrnak lungthin he kan si ter hna lai…. Pathian nih aa
porhlaw mi cu a doh hna i, mi toi aa dor mi kha vel a ngeih hna(James
4:6b).”
Kan ulhcaan cu lungtho ngai in lut cang u sih. Vawlei harnak,
tukforhnak phunphun, pumas ral le thlarau ral phunphun kan teinak
siter u sih.
Fr. Hre Kung