Bawikri ah dawt mi nu le u le nau hna,
Nan sinah Pathian daihnak le hnangamnak cu a thar in tlung than hram ko seh.
Samuel cu Pathian rian ttuantu Eli sinah a ummi pa a si. Veikhat cu Pathian kuang a umnak Bawipa biakinn chungah khan Samuel cu a it lio ah Bawipa nih “Samuel! Samuel!” ti in veithum tiang a rak auh. Eli nih a ka auh tiah a ruah caah Eli sin cu a va tli i “Hika ah hin ka um na ka kawh caah” tiah veithum tiang a va ti. Eli nih kan auh lo tiah a ti. Samuel cu Bawipa nih a ka auh ti a theih lo. Sihmanhsehlaw Eli nih cu Bawipa nih Samuel cu a auh ti a theih caah Samuel cu ruahnak a pek, “A tu an auh than a si ahcun ‘Chim tuah, Bawipa, zeitintiah na salpa nih a theih ko,’ tiah na ti lai,” tiah ati. Samuel cu Eli chimh ning in Bawipa nih “Samuel! Samuel!” tiah a auh than tikah “Chim ko, zeitintiah na sal nih a theih,” tiah a ti. A bia lehmi thawngin Bawipa nih Samuel sinah a um . Samuel cu Bawipa bia kha pakhat hmanh vawlei ah lohlakter lo in aa nung pi. Samuel nih Pathian he a ton kho nak cu Eili nih biatak a chimhnak thawng le amah nih Eli chimhmi a ngainak thawng in a si.
Gospel chung zong ah Johan zultu pahnih Jesuh an hngalh kho mi cu Johan thawngin a si ve. Johan nih biatak a chimh ruang le anmah nih Johan chimmi biatak cu an ngaih caah Jesus cu an hngalh kho. “Zultu pahnih le Johan hna nih an dirnak khan Jesuh aa chawk cu an va hmuh. Cu ti ah Johan nih cun a hei zoh i, “Pathian Tuufa khi zohhmanh u,” tiah a ti hna. Cu bia a chim cu a zultu pahnih nih khan an theih i Jesuh cu an zulh. Jesuh sinah khan an kal i a umnak cu an va hmuh.” Andrew u Simon zong cu a nau Andrew nih biatak a chimhnak thawng in le cun amah nih a nau chimhmi biatak cu a zumh caah Jesuh cu a hmuh kho ve. Jesuh hnu cu a thih tiang in a zulh mi a si ve. “Jesuh a hmuhtu hna pahnih chungin Andru nih a tuah hmasa bikmi thil cu a u Simon va kawl kha a si i, “Messiah cu kan hmuh cang,tiah a a ti i a u Simon cu Jesuh sinah khan a kal pi” ti a si.
Samuel nih Pathian aw a ngalh lo caan ah Pathian aw a ngalhtu cu Eli a si. Eli nih a theih hngalh mi Pathian aw cu amah ca longah aa chiah lo. A hngalh ning in Samuel cu Pathian aw a si tiah, “Biatak” a chimh. Eli nih Samuel cu Pathian nih an auh tiah biatak a chimh hnu long ah Samuel cu Pathian nih a ka auh, Pathian aw a si tiah a ti kho i “Chim ko, zeitintiah na sal nih a theih,” tiah a ti kho. Cun anung chungvialte Pathian bia cu aa nung pi kho.
Johan nih amah zultu pahnih hna cu Biatak a chimh hna ,“Pathian Tuufa khi zohhmanh u,” tiah a ti hna. Cu hnu long ah amah zultu pahnih cu Jesus hnu cu an zulh kho ve. Cun Adrew zong Jesus he an i ton hnu cu a u Simon sinah biatak a chimh ve, “Messiah cu kan hmuh cang,” tiah a ti i Jesus sinah a kal pi. Cu hnu longah Simon cu Jesus he an i ton kho ve.
Eli nih biatak chimh lo in keimah kan auh ti hna seh law Samuel cu biatak a theih kho lai lo. A nungchung vialte biatak theih lo in a vai ko hnga. Samuel nih Eli chimhmi biatak cu zumh lo in um hna seh law Pathian auhnak cu a leh khanh kho lai lo. A nungchung vialte Pathian bia lo in a nung ko hnga.
Johan zong amah hnu zulhtu hna cu biatak chimh lo in um ning law amah zultu pahnih cu Jesus an ton kho lai lo. Cun amah zultu pahnih hna nih Johan chimhmi biatak cu zumhlo in um hna ning law Jesus cu an ton kho ve lai lo.
Andrew zong nih amah hmuh ning in biatak chimh hlah ning law a u Simon cu Jesus sinah a phanh kho hnga lo. Simon zong nih a nau chimhmi biatak cu zumh hlah ning law Jesuh sinah a phanh hlei lai lo.
Eli zong a si zongah, Johan a si zongah, cun Andrew a si zongah biatak cu an chimh. An chimhmi biatak ruangah theihtu asi mi Samuel, Andrew le a hoipa, cun Simon hna cu biatak an theih khawh. Samuel, Johan zultu pahnih le Simon hna zong nih an theihmi biatak cu an zumh ve hna caah Pathian le Jesus cu an ton kho hna, an nung chung vialte Pathian bia cu an i nungpi kho. An nunnak tiang pek in Pathian bia cu an i thi pi kho.
Kanmah zong ni tim kan nunnak ah Samuel bangin Pathian nih a rian tuan dingah a kan auh. A sina in Pathian aw cu Pathian aw in kan rel kho lo. Pathian aw cu midang aw ah kan ruah ton. Samuel nih Pathian aw theih lo in Eli sinah a tli bantuk in Pathian aw kan ngalh ve lo caah Midang sinah kan tli ve ton i na ka auh maw tiah kan va hal ton hna.
Leicungah Biatak theih ko nain biatak Phuang duhlo mi hna ruangah le Biatak theihlo mi nih a phuangmi bianal hna hruangah lei cungah Biatak cu a leng kho ti lo. Bianakbia ah Leicung ah bu relcawh lo tiang in a umnak zong hi biatak hngalhtu nih biatak phuang duhlo caah le Thawngtha chimhtu nih biatak theih lo ruangah Pathian biatak cu mitampi nih an theih kho ti hna lo. Keimah nih kan auh, na theihmi aw cu keimah aw a si an ti len hna tikah mitampi cu Pathian aw tak an theih kho ti lo. Pathian aw tak an theih kho lo caah Pathian bia cu an nunnak ah an i nung pi kho ti lo. Leicungah hin Satan hnu zulhtu pawl hna nih a nakmi kha a rang an ti cang, a rangmi kha a nak an ti cang. Biatak kha an phuang duh ti lo.
Leicungah hin biatak chumhtu hna chimh bia hna zumh duhlo ruangah biatak cu len kho ve lo. Mi cheuhkhat cu Samuel, Johan, le Andrew hna bangin, “Keimah kan auh lo Pathian nih an auh”, “Pathian Tuufa khi zohhmanh u”, “Messiah cu kan hmuh cang,” ti len hna zong ah an zumh duh hoi tik ah Pathian cu an theih kho ve lo. Pathian bia cu an i nungpi duh ve lo. Mi aw cu Pathian aw kan ruah cang i Pathian hnu zulh lo in mi hnu kan zulh cang. Pathian duhnak tuahnak duhtuah kanmah pumas duhnak kan tuah.
Ni hinah Mithiang Paul nih a kan chimhmi biatak cu “Minung pum hi sual tuahnak caah hman ding a si lo, Bawipa rianṭuannak ca tu ah hman ding a si deuh, 15Nan pum cu Khrih pum a ṭengnge a si kha nan hngalh. Khrih pum a ṭengnge cu i lak riangmang in hlawhhlangnu pum a ṭengnge ah cun ka ser hnga maw?, 18Nu le pa sualnak kha hrial ko u. Sualnak dang nih cun mi hi a pum kha a hnorsuang lo, asinain nu le pa sualnak a tuahmi nih cun amah pum cung hrimhrim ah khan sualnak a tuah a si. 19Nan pum cu Thiang Thlarau biakinn a si kha nan hngal lo maw? Nannih cu nanmah ta nan si lo, Pathian ta nan si; * 20a man in cawkmi nan si. Cucaah nan pum cu Pathian sunparnak caah hmang u.” tiah an ka ti.
Cu caah biatak theih kho dingah Biatak hngalhtu nih a hngalh ning bangin in a chimh a hau. Biatak hngalhtu nih a chimhmi biatak cu a cotu pa nih a zumh a hau ve. Cu longah Pathian he ton khawh a si.
Eli , Johan , Andrew le Mithiang Paul hna bang in biatak cu biatak a theih lo mi hna sinah phuang i zuam uh sih. Kan theih mi, kan hngalhmi, kan zumhmi biatak cu mi sinah phuang hna uhsih. Biatak a theih lo mi hna sinah biatak cu phuang i Khamhtu Bawi sinah kalpi i zuam hna uh sih. Samuel, Johan zultu pahnih, le Simon hna bang in biatak hngalhtu nih an chimhmi biatak cu zumh ve cang uh sih. Cu biatak cu kan thih tiang i nungpi hna uh sih.
Bawi Kri dawtnak chung in,
Fr. John Mang Peng (L.W.M.T)
St. Joseph Catholic Church
#1788B NR5, Phnom Penh 12105
Cambodia
Mobile: (855) 93791977
(855) 68597382