1. VAILAMTAH HMELCHUNHNAK (Mt.28:19,Gal.6:14)
Pa,le Fapa ,le Thiang Thlarau min in. Amen.
2. BAWIPA THLACAMNAK(Mt.6:9-13)
Vancung a um kan Pa,na min thiang ko seh,Na pennak tlung cang ko
seh,vancung bantuk in lei cung ah na duhnak tling cang koseh.
Nifa kan herh mi rawl kha nihin kan pe ko sawh.Mi nih kan cung i an
sual tikah kan ngaithiam ve hna bangin kan sualnak kha kan ngaithiam
ve tuah.Sualforhnak ah phakter loin,tthat lonak in kan khamh
tuah.Amen.
3. MAW MARY(Lk.1:28,42)
Maw Mary,i lawm ko,Pathian vel in na khat i, Bawipa cu nangmah sinah
a um.Nang cu nuu vialte lakah thluachuah hmu mi na si i, na
chungchuak Jesu kha thluachuah a hmu.
Mithiang Mary,Pathian Nu,kannih misual kha atu le kan thih lai caan
ah thla kan campiak tuah.Amen.
4. THANGTTHATNAK CU (Rom.11:36)
Thanngtthatnak cu Pa le Fapa,le Thiang Thlarau cungah um ko
seh;Hramthawh lio caan bantuk in atu le a zungzal um ko seh, dong hin
loin.Amen.
5. LAMKALTU HNA ZUMHNAK BIA (Mt.28:19-20)
Zeizong tuah kho,van le vawlei sertu Pa Pathian kha ka zumh.Thiang
Thlarau in a pawi i Ngaknu Thiang Mary nih a hrin mi Pathian Fapa
ngeihchun, kan Bawipa Jesu Kri ka zumh.Pontias Pailat kut ah sifah a
in, vailam an tah,a thi i an vui.Hell ah a ttum i nithumnak ah mithi
sinin atho tthan.Vancung ah a kai i zeizong tuah kho Pa Pathian
orhleikam ah tthu. Khi hmun in mithi le minung biaceih awkah a rung
ttum tthan lai.Thiang Thlarau, a thiang mi Katholik Bupi,mithiang mi
pumkhat sinak,sualngaih thiamnak,pum thawhtthannak le zungzal nunnak
ka zumh.Amen.
6. ZUMHNAK THLACAMNAK (Mk.16:16)
Maw ka Pathian,nangmah kha kan zumh i na Bupi cawnpiak mi vialte kha
ka zumh dih.Zeitintiah nangmah chim mi bia a si i,na bia cu a ding.
7. RUAHCHANNAK THLACAMNAK (Rom.8:24)
Maw ka Pathian, lei cungah na vel bawmhnak le vancung ah zungzal
nunnuamhnak hmuh awkah a ka Khamhtu Bawi Jesu Kri thawngin kaa
ruahchan.Zeitintiah na rak kan kamh cang i na bia cu a hmun zungzal.
8. DAWTNAK THLACAMNAK (Mt.22:37-49,1Cor.13:13)
Maw ka Pathin,nangmah cu na tthat tuk caah zeizong vialte nakin kan
dawt.Nangmah caah ka innpa kha kei mah pum bantuk in ka dawt hna lai.
9. PATHIAN NAWL BIA PAHRA (Ex.20:1-17)
1. Keimah cu Bawipa na Pathian ka si;Keimah hlei in pathian dang kha
zumh in na biak lai lo.
2. Na Bawipa Pathian min kha sersatnak in va hmang hlah.
3. Pathian ni kha thianter va philh hlah.
4. Na nu le na pa va upat hna.
5. Lai va nawng hlah.
6. Nuu le paa sualnak tuah hlah.
7. Va fir hlah.
8. A hmaan lo mi tehte va khan hlah.
9. Midang nuva kha va hngar hlah.
10. Midang thil kha va hngar hlah.
10. BUPI NAWLBIA PARUK
1. Zarhpi ni le biaknak puai ni ah Missa nan ngai lai.
2. Kum khat ah a tlawmbik ah voikhat tal sualthlah nan hal lai.
3. Bawi Jesu thawhtthan caan chungah a tlawmbik ah voikhat tal
Bawipa thisa nan ei lai.
4. Sa le rawl ulh ni ah nan ulh lai.
5. Bupi riantuannak ah nan bawmh lai.
6. Tthitumnak kha ulhnak caan lio ah nan tuah lai lo.
11. AUHNAK HMUH AWK CA THLACAMNAK
Vailamtah cungah kannih caah thihnak ingtu,maw a kan dawbik tu Jesu
Lungthin Thiang, kannih bu kha kan zangfah tuah.Minung vialte zong
nikhatkhat ah vancung ram pel loin an phak khawhnak lai,na phung ding
kha cawnpiak in na biaknak phung hruaitu a thiang mi
siangbawi,brother,sister le saya hna kha kannih chungin run thim hna.
(Maw a Thiang mi Jesu Lungthin, run kan zangfah ko tuah)3
12. ZINGLEI PEK CHANHNAK
Maw Jesu,nihin chung i ka tuah hnga mi, ka ruah hnga mi, ka in hnga
mi sifah retheihnak vialte le ka cam hnga mi thlacamnak vialte kha a
Lungthin Thiang duhnak he aa khat tein siter awkah a Thiang mi Mary
Lungthin in na sinah kan pek.Amen.
13. ANGELUS
H. Bawipa vancung mi nih Mary sinah thawng a run thanh.
K. Amah nih Thiang Thlarau in fa a pawi.
(Maw Mary,i lawm ko,……)
H. Zoh hmanh! Keimah cu Bawipa salnu ka si.
K. Na bia bangin tling ko seh.
(Maw Mary,i lawm ko,……)
H. Bia cu minung ah a cang i,
K. Kannih lakah a um cang.
(Maw Mary,i lawm ko,……)
H. Maw a thiang mi Pathian Nu,thla kan campiak tuah.
K. Kri biakamnak hmuhtlak kan sinak hnga.
H. Thlacam u sih.
Maw Bawipa, na vel cu kan lung chungah run khahter ko tiah kanin
nawl. Zeitintiah vanmi thawngthanhnak in na fapa Kri minung cannak kha
kan hngalh bangin, a sifah innak le vailam cung a thihnak thawngin;
kannih nih a thawhtthan lianngannak kan co khawhnak lai kan Bawipa Kri
min in kanin hal.Amen.
14. THLUACHUAH HALNAK
Bawipa Pathian i velngeih zangfahnak cu kan cungah um zungzal ko seh.Amen.
15. MITHI CA THLACAMNAK
A thi cia mi hna an thlarau cu zangfahnak hmuh in daihnak chungah i
din ko hna seh.Amen.
16. MAW VANSIANGPAHRANG NU
(Thawhthan caan ah cam awk.)
H. Maw van Siangpahrangnu, i lawm ko.Alleluia.
K. Zeitintiah hrin awk naa tlak mi kha.Alleluia.
H. A chim cia bangin a thotthan cang.Alleluia.
K. Pathian sinah thla kan cam piak tuah.Alleluia.
H. A tampi i lawm ko,maw Ngaknu Thiang Mary. Alleluia.
K. Zeitintiah Bawipa cu a tho tthan taktak cang.Alleluia.
H. Thlacam u sih,
Maw Pathian,na Fapa Bawi Jesu Kri thawhtthannak in vawlei cungah
lunglawmhnak kha na umter cang.A Nu Ngaknu Thiang Mary thlacampiaknak
thawngin,zungzal nunnak i lawmhnak kha kan co khawhnak lai run kan
zangfah ko,tiah kan Bawipa Jesu Kri min in kanin hal.Amen.
ZAN THLACAMNAK
1. SUALNGEIHCHIH THLACAMNAK
Tahchunh khawh loin a ttha mi le duh awktlak bik mi Bawipa, nangmah
cungah ka sual cang i, kan sualnak vialte caah ka ngaih a chia i
ngaihthiamnak kan hal ko.Bawipa,nangmah kan dawt caah kaa ngaichih
cang i nangmah vel bawmhnak thawngin sual ti lo awk le sualnak lam
vialte kha hrial awkah kaa tim cang i ka sualnak caah tuahnak ttha in
liam awk kaa zuam lai.Amen.
2. PUMPEKNAK
Maw ka Pathian,ka thih te lai kha ka hngalh.Ka thih caan cu ka hngal
lo.Sihmanhsehlaw kaa hngilh hlanah ka pum le ka thlarau kha na kut
chungah kan pek.Nangmah duhnak bantuk in na hnatlak caan paoh ah thih
ka duh.Khi ttihphan awk thih caan a phanh tikah,Bawi Jesu hmaizah
in,ka sualnak vialte rak ka thlahpiak tuah.
Jesu,Mary,Joseph,ka Bawi hna,nanmah kha ka lungthin, ka thlarau le ka
nunak kan pek hna.
Jesu,Mary,Joseph, ka thih deng tikah run ka zoh u,run ka bawm u.
Jesu,Mary,Joseph, nan bu chungah nunnuam tein rak thi hram ning law.Amen.
3. ZOHKHENHTU VANMI SIN THLACAMNAK
Maw a ttha vancung mi, keimah zohkhenhtu ah Pathian nih a chiah mi,
ka ceuter in ka veng law, ka hruai in ka peng ko,chun nitlak in zan
khuadei tiang.Amen.
Tialtu
--
Fr.David
Kalay Myo
phone, 0947073095